任天堂2002年壓軸王牌Game《薩爾達傳說：風之指揮棒》終於推出，之前預訂送特典已經搞到人氣勁升，連最新一期日本權威Game雜誌《Fami通》，四個編輯都畀隻Game滿分，成為日本史上第四隻滿分作品，可謂叫好又叫座，都咪話唔巴閉。
記者：徐影龍
遊戲類型：ARPG
對應機種：GAMECUBE
遊玩人數：1人
開發商：任天堂
售價：$350（連預約特典$520）
售賣點：DreamStore
地址：灣仔東方188商場256號舖
電話：25753285
除之前嘅《時之笛》（N64）、《Soulcalibur》（DC）同《VagrantStory》（PS）外，《風之指揮棒》成為史上第四隻滿分之作，呢個榮譽唔係咁易攞，連最多人玩嘅《FF》、《勇者鬥惡龍》系列都未試過攞滿分，而《薩爾達》系列就已經佔咗一半，可以想像其喺機迷心目中嘅地位。今次《風之指揮棒》連埋預約特典嘅《時之笛》，令機迷可一次過享受兩隻滿分作品。
故事講述主角林克生日當天，為救跌落精靈森林嘅海賊首領，竟連累妹妹被巨型怪鳥捉走，最後林克攞齊寶劍同盾牌，出發營救妹妹之餘，順道鏟除專捉女孩嘅邪惡集團，的確夠老土。
雖然今次同樣以3D製作，不過就放棄採用真實嘅貼圖方式，全部以卡通落色手法表達，充滿手繪風味，令到林克擁有豐富多變嘅表情同動作，又唔會成嚿多邊形起晒角咁周圍走，相當之討好，加上卡通化嘅表情夠晒鬼馬，同過場動畫互相配合，可謂集2D同3D嘅優點於一身。
今集操作基本上同《時之笛》差不多，不過就加入更多動作，尤其係揮劍技巧亦有不少，同敵人對打時感覺勁爽！玩家可定時返到家鄉，搵番贈劍嘅師傅，就會學到新招式。謎題亦唔算難，不過根據《薩爾達》嘅傳統，要爆機唔難，不過想攞齊特殊寶物同紅心，就要花更多精神同時間慢慢搵喇。
喺遊戲中段，會獲得一樣貌似GBA嘅道具，令接駁至GAMECUBE嘅GBA出現一個名為「Tingle-ceiver」嘅模式，以地圖顯示方式標示出平常見唔到嘅特殊寶物，如Tingle-Bomb等道具，話唔定重有大量珍貴隱藏道具，同GBA有互動之餘，亦做到二人合作嘅遊戲形式，相當之鬼馬，詳情可參閱說明書。
後話：
坦白講，筆者當年並不喜歡《時之笛》，主要係《薩爾達》首次3D化，以當年技術嚟講，完全失去傳統味道，今次《風之指揮棒》表達上就成熟得多，動作及表情發揮得淋漓盡致，故事及動作都睇得出任天堂好有製作嘅誠意，抵佢攞滿分。順帶一提，任天堂官方網頁有《時之笛．裡》嘅攻略提供，玩唔掂嘅人不妨上去睇睇。
網址：
《薩爾達》同《瑪利奧》一樣，可算每一代任天堂新機嘅護航招牌作品，雖然近年N64及GAMECUBE嘅《薩爾達》都趕不及跟機同步發售，不過兩個版本嘅《薩爾達》都屬滿分之作，可謂慢工出細貨。
經典回顧
1986《薩爾達傳說》(FC)
首度面世，利用不同道具過關斬將，自此成為ARPG經典。
1991《諸神之黃昏》(SFC)
再度突破之作，畫面、內容大幅增加，表裡唔同地圖令集齊寶物難度更高，是筆者最難忘的遊戲之一，當時拿着出入表裡世界的道具鏡子周圍走，既玩到頭都爆，但又非常過癮。
1998《薩爾達傳說DX》（GBC）
繼承傳統故事性及豐富謎題特點，畫面發揮GameboyColor機能極限，其中一幕要用GB那個十字掣打斜跳，真係玩到手指頭都痛。其後2001年更推出了《不可思議的木之實》，分為《大地之章》和《時空之章》兩個版本，除了操作方法相同之外，故事完全不同，更可將兩者資料互換，以得到特別寶物。
1998《時之笛》（N64）
首次立體化之作品，令動作更活靈活現，今次不玩表裡世界，但玩時空穿梭，利用時之笛轉換時間，一樣玩到你頭暈。其後2002年推出了外傳《Majora'sMask》。