古天樂呢兩年喺內地幾紅，所以有唔少人搵佢拍廣告，今年佢就答應幫苗僑偉嘅眼鏡公司設計LK系列太陽眼鏡，重做埋代言人。早幾日佢又為最新設計嘅太陽眼鏡拍咗一輯硬照，古仔話：「今次我設計嘅『ZeroX』系列眼鏡，係用紋身圖案做基礎，我覺得呢款設計有啲壞孩子味道，感覺幾特別。」
古仔最近忙緊拍賀歲片《百年好合》，佢話同杜琪峰合作拍戲的確得益唔少，因為阿杜好識教演員做戲，所以拍完呢部戲之後，佢都希望遲啲可以有機會同阿杜再合作拍一部以男性為主導嘅剛陽戲。
台灣組合F4後日喺紅館舉行演唱會，據知𠵱家頭五行嘅飛已經炒到成四千蚊一張。到時喺場外重會有F4嘅寫真集同十二吋人形公仔賣，必定會令fans搶購。為咗今次香港演唱會，F4已經苦練廣東歌，重決定由周渝民唱劉德華嘅《倒轉地球》；言承旭唱《春光乍洩》。
另外，吳建豪噚晚就去咗紅館睇周杰倫尾場個唱，實行偷師。
章小蕙噚日喺佢間時裝店好雀躍咁話，佢已經攞咗紐約化妝品牌LindaCantello下年嘅亞洲區代理權，佢話：「呢次可以話係我事業上嘅轉捩點，我養老都靠晒佢㗎啦，遲啲我間時裝店會裝修，嚟緊我會將一半資金擺喺化妝品生意上，時裝只會保留幾個最鍾意嘅牌子。」
由陳曉東、李彩樺同周麗淇等主演嘅網上連線劇《百分百感覺之冬日戀曲》，會喺今個星期五推出。陳冠希（Edison）同蘇永康會喺首集客串，Edison喺套劇度扮一個持雙程證嚟香港嘅窮小子，佢入東東同方力申間屋度偷嘢，不過俾人誤會佢係蘇永康嘅表弟。日前Edison拍一場俾人揭穿身份嘅戲份，佢除咗俾人五花大綁之外，重俾人用雞毛掃教訓，認真陰功！
李克勤同譚詠麟（阿倫）下年二月一號至六號會喺紅館舉行六場演唱會，噚日開始用信用卡訂票，但係一開賣就打唔通電話。阿倫講笑話：「𠵱家買演唱會飛重難過買股票。」阿倫同克勤早排拎住甘笋拍個唱嘅宣傳海報，佢哋重去咗中環街巿取景，大受市民歡迎。