OnlineGame「戲谷麻將館」近日頻頻爆線，原來高手新手都為月尾舉行的「總統套房決賽」努力。因為由即日至12月19日打得最多場數的八強，可到紅磡海逸酒店總統套房參加12月28日舉行的通宵爭霸戰。而這間四千呎、日租三萬蚊、有無敵海景嘅「麻雀房」更是中國國家主席江澤民入住過！每打兩小時還有15分鐘休息，你可享用房內按摩浴池、桑拿等設施！
記者：李玉蘭 攝影：陳穎
哈姆 20多歲 護士
「以前我好鍾意一路打牌，一路同Friend傾偈，所以一出糧就打，但贏朋友錢又令我唔好意思！但玩Online就勝在可以同陌生人打，狂數佢都唔使就住就住，雖然玩假錢，但一樣有好大滿足感，搞到我愈打愈大癮！」
羊羊 20幾歲 孕婦
「我最近搬咗屋，好難約齊腳打牌，加上𠵱家有BB，唔可以四圍去，所以打OnlineGame最好。唔怕輸錢影響情緒，亦唔怕傷神，因為佢會提你上牌、食牌。有時打到攰想飲杯水，都可以由電腦代打！但個Game好抵死，有時整蠱你，令你食唔出！」
靚靚太 30幾歲 牙醫助護
「呢兩個月，我打咗過百場！成績？負分！我知一定入唔到圍，但我都好Enjoy，又識到幾個好朋友！但有時我掛住打字傾偈，被其他網友笑我站長！」
森虛 20幾歲 電腦
「雖然我只打咗六十幾場，但食過大三元同大四喜，所以成功上榜，由新手打到排第三！我𠵱家打真牌，都會有少少斬獲！」
查詢網址：