要在香港食到地道風味台灣菜不難，但價錢定必不菲。最近無意中在旺角搵到間既有風味，你同我都可以負擔得來的正宗台灣餐廳，八十零蚊的薑母鴨已屬貴價菜，不是誇口，在稍有知名度的台式料理館中，起碼要過百元，而在這裏炮製菜式的大廚還大有來頭，遠赴台灣學廚十多年，絕對是信心的保證。
記者：陳冰麗
攝影：伍慶泉
來到桃園台灣料理，即時想起鍾意食台灣菜的一個好朋友，即刻Call埋佢順道一同去試新菜，點知原來我這位朋友不但是這裏的常客，還與這裏的大廚張師傅頗熟絡。
坐低無耐，即有侍應遞上一碟脆皮大腸免費供我倆品嘗，原本不好豬大腸的我，在朋友的極力推介下勉為其難食一件，果然出奇好味，大腸比我想像中不肥膩，相反還好香口，好奇之下，好想認識這位張師傅，希望可以向他偷偷師。
細問之下，張師傅原來是這裏的總廚，大部份菜式除由他親自操刀外，還有另外兩位具經驗的徒兒助陣，分別是台灣人劉永康和曾在台學廚逾12年的孫偉明。
百分百香港人，以學點心起家的張師傅，沒有正式跟台灣師傅學廚，他之所以識煮台灣菜，背後原來有段古。
「說來話長，差唔多二十三年前，當時我二十九歲，因為一次嘅機緣，同一班朋友到台灣玩，認識咗𠵱家嘅太太。佢係地道台灣人，第一次見到佢，我就被佢嘅笑容所吸引，返到香港就成日諗起佢，食唔安瞓唔落。」
張師傅就是因為愛上這位台灣女子，於是把心一橫，由香港追到台灣去，實行「婦唱夫隨」，定居台灣，更在當地開設其台灣料理，前後逾二十年。太太屋企人因為本身亦是開餐館，所以原本對煮台菜不太熟悉的張師傅，得到太太及其家人的協助下，不足三個月即已掌握到煮台菜的要點。
「台灣以小食居多，菜式以酸、甜味為主，唔太鹹，起初都未適應到當地飲食文化，尤其係帶酸甜嘅台菜我就最怕，不過食食吓慣咗，就開始覺得原本需要加醋嘅菜式，一旦無咗醋又即刻變得無乜味，好似食擔擔麵時都係覺得加啲烏醋一齊食先至好味咁。」
要在港做到有地道風味，但又要迎合港人口味的台菜，張師傅認為這是最首要考慮的因素，當中可能需要加減用料，作出變動至可以。
「台灣菜可以好清淡，但亦可以好濃味，好似芋丸會較清淡，如果加埋齋糖水食，香港人可能會嫌太寡，所以我會加入圓肉、杞子去一齊煮。」
事實上，桃園有三位具經驗的大廚撐場，亦有由台灣直接空運抵港的調味料配合，所以要在這裏食地道台灣菜一點也不難。
三杯乃指烏醋、醬油、砂糖各一杯，以三杯作為配方，即可以任意做出自己喜愛菜式，好似三杯雞、三杯中卷（鮮魷）、三杯花枝（墨魚）等。三杯雞採用鮮雞，配以薑、辣椒爆香後，配以三杯醬料去燜至雞腍，雞肉便有酸、甜、香、辣四種口味。
與台式做法略有少少分別，大腸以滷水料滷約一小時後取出，原本應該就咁炸熟就食得，不過大廚則花少少心思，加以改良，在大腸內塞入較粗身的京葱一同炸，令食嘅同時不但有京葱的香，還減少一份肥膩感，這是小記心水推介。
用的是五花腩肉，要做到腍而入口不膩，大廚話必須將五花腩肉先烚，後炸，然後至用滷水料滷至入味。烚是要減少肉肥膩，再炸，可將多餘油份迫出，再滷就能吸味，入口肉鬆而不覺肥膩。
是台灣人冬天必食的藥膳湯，有祛風行血、補氣補血功效。用料除米鴨外，還包括有十多種藥材磨成的粉末、多種矜貴藥材如川芎、北芪、杞子、黨參等，再加入老薑、米酒、陳皮一同煲至少三小時，呷兩啖，成身即時感到暖笠笠。
台灣九份出名芋頭、番薯香，芋丸是當地其中一款特色糖水。是以芋頭肉混和生粉搓製而成，烚熟拌以齋糖水食，為配合港人口味，大廚加入圓肉、杞子，而芋丸入口煙煙韌韌，帶濃郁芋頭香。
桃園台灣料理
地址：旺角豉油街28-34號旺角廣場1樓
電話：23887328
營業時間：11:00am-2:00am
座位：130個
付款方法：現金或信用卡