內地著名食肆近年紛紛來港大展拳腳，杭州菜館「新開元」嘅香港旗艦店明日正式開張，重請傳媒試食㖭！
新開元香港分店設喺尖沙嘴廣東道新港中心三樓，不過，原來佢哋好轉折先租到呢個場㗎。聽講新開元喺6月傾緊租新港中心二樓，貪呢度人流夠集中，點知畀稻香超級漁港捷足先登，商場大業主華人置業就話介紹佢租第二度，新開元唔制，同月喺廣東道搵到另一個舖位。
事情原本告一段落，但新開元發現呢間舖嘅契原來唔係食肆契，覺得唔妥，所以打退堂鼓，再搵過地方。咁啱呢個時候新港中心三樓嘅「老飯店」遷出，新開元得悉後嗱嗱臨承租，面積近一萬呎，終於租到心頭好。
新地喺國際著名財經雜誌《Euromoney》最新一項調查中，被評選為2002年度「香港最佳公司」同「亞洲最佳地產公司」第一名，連續第二年攞到呢個獎。
該財經雜誌向亞洲區銀行家同證券分析員進行調查，評選基準包括：市場優勢、盈利能力、增長潛力、管理質素同財政收益，結果新地獲得高度評價而摘冠。
政府為救樓市推出嘅九招，包括取消內購限制，發展商以後賣樓真係可以講鍾意點就點，所以近期開賣嘅新盤，花招百出。
由於發展商隨時可以賣樓，又唔使預早公布價單，收到嘅票數亦唔需要登報公布抽簽次序。所以好多嘢記者只能聽發展商或市場點講就點寫，要查證都好難，以後發展商講嘅嘢就「信不信由你」嘞。買家有乜保障呢？
上環帝后華庭今個月7號通宵賣樓一役，總共賣出約七百戶，代理都係靠呢鋪搵食。
利嘉閣上個禮拜就喺帝后公開發售前搞祝捷會，長實營業經理郭子威，同新世界營業及市務經理黃浩賢都有到場，重坐足全場㖭！
蘭西聽利記分行經理招佩貞（圖二右一）講，旗下嘅Andy同Ringo呢對組合，總共促成七宗帝后華庭成交，兩人平分九萬蚊佣金。Andy今年7月先加入利記，屬新仔一名，而Ringo98年尾入行，做咗兩年轉做物業管理，啱啱上個月重返代理行。
招佩貞話新人勝在夠搏，但經驗不足，要舊人協助，所以新舊人配搭就能發揮最大威力。除此之外，佢話個別代理都有一人促成四至五單交易嘅戰績。
近期不時都聽到有投資者入市買嘢，但亦有啲積極出貨，中原地產太古城智星閣分行經理張光耀講，一中資公司剛賣出太古城海天花園景天閣高層H室，708呎，成交價220萬，呎價3107蚊，低市價約5%，佢話間公司喺呢個零月已經賣咗三個景天閣單位，套現683萬。
由於佢哋係87年一手買入，所以就算平啲賣都賺唔少，不過估計佢哋可能係因為資金調動嘅關係先至沽貨。佢哋重揸住一個景天閣701呎兩房單位，但動向未明。
海天花園喺太古城屬優質貨，所以只要平啲就好快有承接。張光耀話因為間中資急售至平賣，係個別例子，相信唔會對屋苑樓價帶嚟壓力。
特區政府鼓勵港人北上發展及工作，但有測量師指出，雖然測量師學會近兩年都盡力同內地相關團體接觸，希望加強雙方的認受性，但進度緩慢。
當然，若果測量師所屬集團，喺內地有搞房地產嘅話，咁就易搞啲，好似中原地產喺內地搞咗好多年代理業務，所以中原測量師行喺內地成立嘅中原中國地產專業服務中心，有唔錯嘅發展，重喺北京開分部㖭。
蘭西
電郵地址：