唔講唔知，瑞典紳寶（Saab）車廠響二次世界大戰前，係一間生產飛機嘅公司，及至戰後嘅1949年，第一部量產型嘅Saab92，響當年12月12日才正式響生產線裝嵌完工呢！究竟響呢五十多個年頭裏，紳寶有幾多顯赫嘅名車公諸於世呢？今趟就不如同大家前赴瑞典紳寶響Trollhattan嘅汽車展館，一齊開吓眼界啦！
記者、攝影：陳偉林
紳寶車廠以飛機起家，呢部低翼機會係該廠戰後嘅首款量產型號。
呢部車當年曾參加過國內越野賽車活動，惟車上並無好多改裝部件，僅車頭加有霧燈同通訊器嘅無線電裝置而已，可謂係一部原裝賽車呢！
呢部Sonett，僅於1955年至1957年間生產有6部車，而呢部白色車屬首部量產型號，並於1956年Stockholm車展中亮相，車殼主要以玻璃纖維模鑄，而一台三汽缸偈有57.5匹馬力輸出，亦曾於40周歲時（1996年），刷新瑞典750cc級車速紀錄，造出159.4km/h呢！
新車較原有Saab92最大改動會係車頭部份，尤其係鬼面罩跟頭燈配搭，而呢部車曾於當年1,800公里ThousandLakes越野賽中勝出；佢以一台748cc三汽缸兩衝程偈為骨幹，馬力輸出經已由原來38匹，提升至65匹咁多喇。
50年代末期，世界流行呢類初級方程式車賽，而紳寶亦於1960年嘗試生產咗兩部賽車，以一台置於車頭嘅940cc三汽缸偈，並用上前輪驅動模式，有86匹馬力輸出，但操控會有轉向不足嘅情況出現。
當年面世並大受用家追捧嘅SportCar，以一台841cc三汽缸兩衝程偈作主打，並裝有三個化油器，輸出達52匹；佢另一個過人之處，會係裝有前輪碟式制動器，可會係突破汽車科技嘅創舉呢！
響1966年正式投產，以Saab96底盤為基礎，再配以塑膠製車殼，一台841cc三汽缸兩衝程偈，輸出60匹馬力，極速達160km/h，並輔以賽車用嘅三個化油器，合共生產咗約258部。
當年，此車屬前置引擎前輪驅動設計，一台1709cc四汽缸偈，經已備有單凸輪軸作平衡，而離合器及波箱更附着引擎結構，有節省空間提升車廂舒適嘅特點。
當年勝出瑞典越野賽嘅冠軍車，原以一台1498cc引擎（馬力65匹）驅動，及後將汽缸擴增至1815cc，馬力亦大幅提升至165ps/7000rpm，確實令人刮目相看。
呢部屬95車系投產20年來嘅最後一部，紳寶車廠共生產有110,527部95旅行車，而自1967年起，該車款以一台V4偈（馬力68匹）作主打，0至100公里加速僅15秒，極速高達145km/h。
呢部響1980年1月8日，最後一部離開生產線嘅Saab96，標誌住Saab92、93同96系列近30年嘅光輝歲月；據廠方公布嘅數據中顯示，三款車合共生產有730,607部咁多㗎！
當年一部屬Prototype嘅四座位跑車，整個車身主要以碳纖維模鑄，有一個裝滿太陽能電池嘅玻璃車頂，以減低暴曬下嘅車廂溫度。一台四汽缸Turbo偈馬力輸出達285匹，極速重有270km/h咁快㖭！
今年正式投產嘅9-3新車系，頂級Aero有齊全車包圍、兩邊車身裙腳及獨有四輪合金軨配搭，兼且可望於明年中抵港㗎！