聖誕將至，係時候要為家居添些裝飾布置，如果你諗住想慳番一筆，將上年留低的剩餘物資重新再用，咁睇完以下的新貨介紹之後，你就會發現屋企嗰堆過氣裝飾實在死板乏味，事關今年新推出的各路聖誕裝飾講求功能多，尺寸又龐大，重有埋感光、聲控、太陽能發電等，咁有氣勢，梗要買番個喺屋企坐鎮啦！
記者：尹珊珊 攝影：陳穎、陳智良
ImageGirl：Vicki
逢星期一至四刊出
呢隻有成4呎高的吹氣雪人，並唔係一般的聖誕公仔咁簡單，將佢吹到脹卜卜之後，佢就會左搖右擺成個不倒翁咁，有咩不滿即管一拳打埋去，盡情宣洩內心的憤怒，不過如果你覺得太殘忍，亦都可以幫佢加番條頸巾同聖誕帽扮靚靚。
呢棵專門擺放喺戶外的巨型聖誕樹，足足有成8呎高，如果屋企有個大花園，買一個返去做裝飾認真有氣派。不過唔好以為佢係吹氣公仔的一種，其實在聖誕樹下面安置咗一個泵機，開啟後風力不停向上吹，咁就可保持聖誕樹咁「豐滿」的形態，而且喺樹下面有晒鐵架支撐，側邊亦有鐵鈎可以用繩拉緊，咁就唔怕小朋友興奮得滯推塌佢。
唔係人人都咁幸福可以度過一個白色聖誕，得閒望吓呢個充滿聖誕氣氛的電動音樂飄雪擺設，也算得上聊勝於無吧！
只要將電源插入，玻璃罩內的白雪粒便會隨聖誕音樂紛飛起舞，聖誕樹上面的燈泡也會閃個不停，當然少不了是拉着鹿車的聖誕老人，亦會隨着四首不斷放送的聖誕音樂而團團轉，交織出一片浪漫的意境。
雖然呢個聖誕老人頭樣子唔係咁討好，但勝在夠精乖伶俐，只要你將佢移向燈光附近，佢唔單止即刻唱番首聖誕歌畀人聽，重識得同你講句HappyNewYear。
乍見以為係普通的聖誕吊飾，但原來內有乾坤，聖誕老人、雪人的頭部隱藏放有一個開關掣，開啟後便有聖誕歌奏出，同時公仔的胸口位置亦會上下震盪，使身上的叮叮隨着音樂噹噹作響，合奏出一首熱鬧的聖誕歌。
掛喺聖誕樹上面的擺設，來去都不過係閃閃令的波波，同埋一大揪聖誕裝飾，想將屋企棵聖誕樹打扮得與別不同，不妨考慮呢個太陽能聖誕活動掛飾。做法是將聖誕樹上的白色高溫燈泡，套落掛飾的太陽能發電板上面，掛飾中間的公仔就會不停轉動，充滿動感。
呢個由TOMY玩具廠出品的音樂小雪人，天生充滿節奏感，佢唔單止有三隻首本名曲傍身，重識得跟住音樂搖搖頭、擺擺身，最厲害佢重可以接駁埋其他兄弟，一齊唱番首大合唱。
無試過亦無諗過可以親手種聖誕樹，但原來只需借助這套D.I.Y.聖誕樹套裝，唔使半日就可以「種植」一棵屬於自己的聖誕樹。雖然所謂「種植」，其實是將一包化學藥水，倒在一棵「加料」的聖誕樹上，再用半天時間等聖誕樹快速生長至8吋高。過程頗為有趣，而且長大了的聖誕樹綴以裝飾品後，也不失為一件精緻的案頭小擺設。
生意通貿易公司
地址：旺角洗衣街127C地下
電話：93123163
JCShop
地址：銅鑼灣時代廣場8樓833舖
電話：31022783
LOG-ON
地址：九龍塘又一城UG01
電話：22655333