日本人每逢聖誕節都好大陣仗，街道例牌掛滿燈飾，不過最開心嘅當然係藝人啦，因為可以出席多啲亮燈儀式活動賺外快嘛。
其實除咗𢱑銀之外，日本藝人喺呢段時間做宣傳，都好鍾意借聖誕樹嚟過橋！今年去得最盡嘅首推二人型佬組合B'z，平時佢哋鬼咁嚴肅，但為咗谷最新大碟《TheBallads》，兩個瘦𤷪𤷪嘅拍檔唔單止戴黑超扮唔夠秤嘅聖誕老人，重喺台場整咗好多棵聖誕樹應節，佢哋足足用咗三萬個燈膽，夾埋使成二百萬港元㗎！不過B'z話出親碟都攞硬冠軍，所以使多多錢都唔緊要喎！
上原多香子、中島美嘉同MEGUMI亦有利用聖誕樹宣傳，早排佢哋先後主持過亮燈儀式，中島嗰棵「TreeofStars」高十七米，而MEGUMI嗰棵因為喺室內，所以只得六米高；至於多香子，最近就成為長崎豪斯登堡嘅代言人。