於南丫島成長的國際影星周潤發，最近獲其南丫島母校邀請他出任校友會的永遠榮譽主席，昨日他返回南丫島參加就職典禮，更受到居民夾道歡迎，而發哥更自爆童年時人人叫他做細狗，不知自己名字是周潤發。
周潤發（發哥）昨日早上八時半獨自乘船到南丫島，出席母校南丫北段公立小學第一屆校友會就職典禮，發哥獲母校邀請出任校友會永遠榮譽主席，而當年曾教過發哥的馬老師亦有出席就職典禮。發哥說：「我啱啱入呢間小學時，其實我都唔知自己叫周潤發，因為個個都叫我做細狗，所以馬老師叫周潤發嗰陣，我都唔識應佢。」
發哥自爆小學三年級曾經留班，他說：「當年細個貪玩，唔識得用功讀書，所以先會留班，不過以前阿媽喺學校開咗個小食部，我放學就會幫阿媽賣涼粉。」在旁的馬老師亦為自己有周潤發這位學生而感到驕傲，他說：「周潤發細個好乖，能動能靜。」
參觀完母校後，發哥順道暢遊南丫島，沿途有不少市民圍着他要求簽名拍照，發哥亦有求必應。發哥透露在港過完聖誕後，將會重新投入工作，他說：「聖誕之後我要去溫哥華為《刀槍不入一僧尼》補戲，呢部戲四月會喺全球上映，之後有乜新工作就要等老婆安排。聖誕港片好似好熱鬧，之前我睇咗《英雄》，我覺得部戲拍得好震撼。」