上環帝后華庭以先到先得方式公開發售十八個平價單位，幾十個幫準買家排隊嘅代理，要喺嚴寒天氣下，捱更抵夜，露宿街頭瞓幾日，終於捱到上個禮拜六下晝三點鐘開賣，準買家先至施然到場，等一陣就可以揀樓。據排頭位嘅代理陳先生講，即使有同事輪更，自己都要瞓足兩晚街，慨歎呢筆佣真係辛苦錢！
向來熱愛毛主席嘅長實趙國雄，當日賣樓之餘，重派毛澤東詩詞集畀記者同首18名買家。老趙特別欣賞代理陳先生，即場送本畀佢，笑笑口對記者講，凡事事在人為，做人都係要積極啲，又乘機噏句毛詩「紅雨隨心翻作浪，青山着意化為橋。」應下景㖭。
另外，長實跟住馬不停蹄為長沙灣泓景臺搞促銷，明日重出動車隊接載歌手容祖兒出席記者會，並由容祖兒主唱泓景臺廣告歌「我的驕傲」。
第四季通常都係寫字樓嘅淡季，聽業內人士講，上個月都係以一千到兩千呎嘅單位多啲成交，最主要係業主肯減租，每呎減成一兩蚊，呎租六到七蚊，所以承接速度快咗！
𠵱家市道咁弱，租客主導，有條件壓價，租金點會唔低呢？
另外，近期寫字樓市場有一特別現象，就係一啲創業人士喺寫字樓新開張冇耐，就草草摺埋，白蝕裝修同定金。有啲同代理講，係因同股東拆夥！但有人估計，其實係呢班人當初冇諗到創業所要面對嘅問題同風險就真。
由香港社會服務聯會首次搞嘅「商界展關懷」評選活動，有唔少從事地產行業嘅公司攞到獎，如新地、和黃、太古同中原地產等。
除新地外，屬下啟勝管理嘅沙田帝堡城，同薄扶林置富南區廣場都一齊攞獎。帝堡城因多次採用庇護工場同殘疾人士機構提供嘅服務，重係第一間設有盲人足底按摩服務嘅屋苑會所，獲社會福利署提名。
而置富南區廣場服務處，為香港基督教女青年會籌募經費，今年曾舉行連串大型活動。
另外，中原地產將網上地圖同社會服務聯會網頁連結，等社會服務資訊顯示喺地圖介面上。同時精英會籌組不定期嘅義工服務，每年又籌辦大型慈善活動。
𠵱家去參觀示範單位，點止睇吓模型、同間屋咁簡單，好似東涌藍天海岸，就大搞花車巡遊、嘉年華會，令一家大細嚟睇樓嘅準買家，喺睇樓之餘重有節目，對樓盤留下更深刻嘅印象。
雖然藍天海岸分層單位開售日期未定，但複式同相連單位「海雲天」就已發市，賣咗五套。蘭西收到料，半數都係由利嘉閣促成，首宗成交亦係由佢哋搞掂，發展商香港興業發展及市務部總經理陳子明好識做，親自到場祝賀同表揚利記員工。
九龍倉為吸引多啲人去擎天半島睇樓，兩個禮拜前搞抽獎活動，凡睇樓者都有機會中獎，獎品劃一係DVD機一部，每個禮拜六同日，定時抽出三位幸運兒，兼即時送出獎品，到噚日為止已送出十二份。
蘭西睇完噚日下晝三點嗰場抽獎，只見現場氣氛相當唔錯，代理同九倉職員都放低手上嘅工作，上前圍觀等抽獎。點解咁緊張？因為佢哋有份參加抽獎，自然有機會中獎，好似噚日嘅幸運兒，就係九倉員工。之前中過獎嘅有地產代理同記者，因為發展商對參加次數同身份全冇限制，代理得閒就填張表，記者上去採訪又填張，員工就更加順手啦，填得愈多中獎機會愈大。
蘭西
電郵地址：