廠家L諗到請員工去睇《麗花皇宮》，便宜過請二線歌星到聯歡會唱歌，確係好橋，如果人數太多，不如買晒一場嘅飛，「包場」更有豪氣，或者更可以同主辦機構講價攞折扣㖭。
講完聽歌，左丁山問廠家L：「請你表個態，你是否患有梁富華議員所講嘅五種症狀？」廠家L大笑：「五種病都冇，只係有第六或第七種症狀，就係軟骨症、耳仔過軟症，以及喉嚨失聲症。你知啦，我哋終日在內地行走，設廠之外，少不免另有投資，好講關係㗎，內地冇關係就發唔到財，我高度重視自己荷包、自己嗰盤生意，咪患上呢啲症狀囉。」
唔多聽得明，請佢舉例說明之。廠家L話：「邊度講得咁明白㗎，心照啦。譬如我一位老友，與我同在某社團做委員，佢亦係同鄉會理事，甚麼市嘅政協委員。最近佢收到電話，當然唔係葉劉淑儀打畀佢啦，而係另外有非政府人士發功，要佢問同鄉會、某社團簽名支持第二十三條立法，跟住佢又叫埋我去簽，總之簽就簽啦，橫掂聽講有一千個社團簽名，多我哋一個唔多，總係要識do嘅。上一次我呢位老友收到電話要佢挺董，佢又咪挺董囉。」
人在江湖，身不由己，廠家L說做順民方便搵食，無可厚非嘅。左丁山問廠家係唔係真心挺董，廠家L傳嚟一個互聯網流傳嘅英德俄中醫生鬥認叻嘅笑話，聽完真係笑唔出也。