經歷過笨豬跳重創嘅股仔如何重生？年輕賓架話，最好係有新老闆加入，新人事新作風，再加埋新錢到，就萬事有商量。
好似之前小初提過嘅盈盛數碼（979），自從東莞新老闆出現後，隻股表現當堂唔同晒。據聞仙股風暴中最大受害者之一兆晉國際（491），亦同樣有老闆加入。
話說兆晉在7月底仙股風暴一役中，大股東慘被斬倉，幕後人雖然企圖度橋求生，但始終未能如願。不過，兆晉早前公布配售15.5億股新股畀一位姓胡嘅女士，似係股權易手之象。
呢手貨佔兆晉擴大後股本16.64%，交易已在上周完成。市場傳聞有關人等自交易公布以來，不斷密密收貨。
上周中段，兆晉成交量明顯增加，上周五股價一度見過2.2仙，收2仙，升5.26%，成交357萬元。
年輕賓架話，尚未摸清兆晉新主來頭，但據聞都係來自大陸，作風頗為辛辣，近期不妨密切注視隻股動態。
慕容小初