九人女子組合Cookies近期氣勢如虹，人氣直迫英皇二人女子組合Twins，有傳兩隊組合都因爭上位而不和。
Twins同Cookies前晚都要去無綫電視城出席《歡樂滿東華2002》，當Twins喺化妝間set頭準備時，Cookies嘅成員咁啱喺佢哋身邊出現斟水飲，就現場所見，Twins繼續set頭，一直當Cookies透明，彼此都冇意識同對方打招呼，簡直當大家冇到。
另外，Twins同Cookies噚日都去咗香港仔出席港台活動，佢哋都有參加「二人三足」比賽，其中Twins嘅蔡卓妍（阿Sa）同Cookies嘅隊長Stephy喺比賽時都唔小心整傷咗隻腳。阿Sa話：「可能唔夠瞓，所以唔小心整傷咗。」
周杰倫喺紅館舉行嘅個唱舉行得如火如荼，而周媽媽為支持佢重特登嚟香港捧場，但係周媽媽睇完演唱會之後，只係畀阿Jay九十八分，扣咗嗰兩分原來係因為佢唔記得歌詞，但係阿Jay就改極都改唔到呢個缺點。阿Jay重話：「歌迷背歌詞比我還熟，應該要好好改進！」另外，原來阿Jay每次唱《最後的戰役》時，都會有腳抽筋嘅情形出現，一連三場都係咁，但係就冇喺台北演唱時咁嚴重。
康子妮噚日喺尖沙嘴為「冬日繽紛聖誕」擔任司儀，問到佢今年點同男友林曉峰過第一個聖誕節，佢就話：「唔知呀！好彩唔使開工，我會買條呔畀佢。因為佢都好少呔，等佢可以襯吓衫。」問到佢最想收到乜嘢聖誕禮物，佢話：「最好收到一架車。」唔知到時林曉峰會唔會令女朋友心想事成呢！
林青霞嘅母親林麻蘭英，日前喺台北因病厭世，跳樓自殺。林青霞今日將會喺台北第二殯儀館替亡母舉行喪禮。據知青霞日前已經低調返台北準備喪事，青霞嘅姑姐連日都去照顧林父，而青霞今日將會安排五個保安人員喺亡母喪禮度維持秩序。
麥浚龍（Juno）噚日坐住一架開篷巴士，由元朗運動場去到元朗富達廣場出席活動，不過有幾位警察到場查問，因為佢哋怕Juno啲fans太過瘋狂，而且警察話明唔畀佢哋掛橫額，否則就會告佢哋非法集會。Juno重話佢做咗「SmartCar」嘅代言人，而且佢重獲贈一架SmartCar㖭！
城城今年經常唔喺香港，唔知係唔係驚香港fans變心，所以年尾頻頻做商場騷。唔理喺慈雲山，定係馬鞍山，都一樣有城城出現。噚日佢去完馬鞍山，就即刻去紅磡漁人碼頭出席生命熱線嘅活動，順便宣傳新碟，喺台上面佢就用自己先後失去爸爸同哥哥做教材，勸勉年輕人要珍惜生命。