下星期三就係聖誕節，相信好多人都想趁呢個黃金假期離開香港鬆弛一下。平日無儲蓄習慣，假期又只得幾日的我，想去旅行似乎無乜可能！上星期同班Friends行街，發現用$88就可以喺兩日聖誕假期出外玩餐飽，雖然只係去中山浸吓溫泉、去珠海睇吓景點，但食足三餐加埋有間不錯的酒店房住，的確超值，今個聖誕終於有得去旅行啦！
記者：歐嘉荃 攝影：韋信
ImageGirl：Irene
晨咁早喺羅湖集合，坐了2個多小時的車，終於到達中山，一輪的參觀行程，對我來說並不太感興趣。叫我較為驚喜的，就係去到珠海圓明新園，見到那一排排的古式建築，才叫我眼前一亮。領隊說：「圓明新園於1997年2月2日建成及開放，佔地面積約有一點三九平方公里，乃珠海最大的主題公園，以北京圓明園的藍圖而建成。」來到這個難得一見的仿古旅遊景點，就算要自掏腰包畀$95入場費都唔會肉赤！
歌舞最正
圓明新園投資了千萬元，上演全新的清朝宮廷劇《大清皇朝》，此劇以康熙同乾隆時代為背景，全套劇都以舞蹈為主，集合了土丹舞、水之舞等不同主題的舞蹈，每幕都有緊湊的聯繫，絕對可以用目不暇給來形容。舞者跳得好，不過我最欣賞的還是金碧輝煌的舞台設計及其華麗衣飾，特別是最後那場歌頌大清盛世的一幕，百多個演員穿上各式各樣的舞衣，那種震撼的場面的確叫人難忘！
外國遊客都話正
霸咗第一排坐嘅外國遊客，全程拿着相機不停咁影，完場後又不停拍手，重不停讚：「VeryGood！」相信佢哋同我一樣，對表演相當滿意。
於西洋樓的景區中，我認為遠瀛觀最值得欣賞，翻查資料，得知遠瀛觀是昔日乾隆皇帝寵愛的香妃生活和娛樂的場所，整座建築物都充滿異國的風情。
中山最出名就係乳鴿同溫泉，唔試過呢兩樣嘢又點算嚟過中山呢？喺中山最出名就係仙沐園溫泉，仙沐園有38種溫泉俾你揀，好似有靈芝、人參、首烏等中藥炮製而成、能美顏護膚防皺的藥霧宮，此外，還有能袪風止痛的木瓜池、酒香醉人的太白池，而我就最鍾意可以美顏兼且防止皮膚乾燥的蘆薈池啦！
領隊教路，要欣賞風景，一定要去石景山公園。石景山公園最大的賣點就係可以坐觀光纜車，從山頂睇晒珠海同澳門嘅全景，雖然只係7分鐘的車程，但都值得坐一坐，靚女Irene話：「個景超級靚，山頂好舒服又開揚，上面重有好多小飾物嘅攤檔㖭！」
唔好諗住幾十蚊無好嘢食，其實餐餐都唔錯，每餐都有八餸一湯。好多人都話每次跟團的最後一餐都特別豐富，今次所食的菇菌餐亦不例外。八個餸都係以菇菌為主，再配白飯和饅頭，惹味又豐富。
幾十蚊團費，你都唔會諗可以住喺五星級酒店，雖然今次住嘅係賓館，除咗餐廳外，乜嘢設施都無，不過我哋住嘅雙人房都算乾淨衞生。若果返到酒店後夜晚想有娛興節目，不妨搭二十幾蚊的士到拱北區的按摩中心按吓摩或者行吓街都得。
團名：中山圓明新園兩天團
團號：LB02
有乜行程：參觀中山濠江杏仁餅家、參觀茶趣園、茶果瀨粉宴、參觀水晶廠、仙沐園溫泉（自費）、圓明新園（自費）、金鹿苑鹿場、石景山公園、春秋百草堂、火炬區軍營等。
團費：$88（大小同價）（不包晚餐、圓明新園入場費$95、仙沐園溫泉入場費$90、石景山觀光纜車$30、圓明新園歌舞劇門票$20）
小費：每人每日$45
出發日期：12月24日
集合及解散地點：羅湖
查詢電話：27358838（中國遊踪）
鳴謝：中國遊踪
其他正團
全團的節目十分多元化，由參觀動物世界、水療中心到Shopping節目都有，絕對是多采多姿。呢個團的最大賣點，是可以歎到最新的中山夏威夷水療中心，兼喺五星級的珠海度假村酒店內食聖誕晚餐。
呢個團第一日就會去參觀香江野生動物園，睇到各式各樣的動物，好似長頸鹿、鱷魚，甚至白老虎及熊貓都有。
團名：野生動物園、夏威夷水療三天豪華團
團號：ZXR
有乜行程：香江野生動物世界、金山鴕鳥園、嶺南小周莊、華蓋歐陸步行街、得勝廣場、夏威夷水療、名人蠟像館、國防實戰基地、百里匯老鋪、紅日迷城蜂之谷等
團費：$1,298（成人）、$688（3至9歲不佔床位的小童）
小費：每人每日$40
出發日期：12月24日
集合及解散地點：香港
查詢電話：28533715（中旅社）
好動首選
唔夠錢去日本浸溫泉，不如改去開平最新的錦江溫泉，溫泉最大的特點就係設有衝浪區，可以在暖笠笠的溫泉水玩浪，的確夠特別，唔玩衝浪，場內重有28個富特色的溫泉池畀你浸餐飽。全團的費用已經包晒各類門票，絕對抵玩。
團名：全新開平錦江溫泉二天團
行程：錦江溫泉、立園、果園
團費：$560（成人）、
$480（9歲以下不佔床位的小童）
小費：每人每日$40
出發日期：12月24日、25日
集合及解散地點：香港
查詢電話：27762774（匡域旅遊）
住得最豪
住宿五星級嘅蛇口南海酒店，重可參觀番禺香江野生動物園、冬蟲草培植農場，可能會走馬看花，不過住得咁豪，都算抵玩。
團名：番禺香江動物園、蛇口5星級南海酒店二天超值團
團號：NHX2
行程：番禺香江野生動物園、冬蟲草培植農場、貔貅工藝店
團費：$328（成人）、$258（1至11歲不佔床位的小童）
（不包括晚餐、酒店玩樂設施費用、番禺香江野生動物園環球動物金像獎門票）
小費：每人每日$40
出發日期：12月24日、25日
集合及解散地點：香港集合、羅湖解散
查詢電話：82002299（美麗華）
一家大細之選
以梅州客家風情為主，遊覽梅州最大的雁南飛茶田同剛開放的半坑旅遊風景區。首天節目有湯湖溫泉，可自費享受熱礦泥及瀑布溫泉。
團名：梅州客家風情三天遊
有乜行程：梅州人境盧、千佛塔、葉劍英故居、靈光寺、雁南飛茶田、半坑旅遊風景區、新豐江大壩、奇石館、香記肉乾廠
團費：$698（成人）、$598（9歲以下不佔床位的小童）（不包湯湖溫泉門票）
小費：每人每日$40
出發日期：12月23日、24日
集合及解散地點：香港集合、羅湖解散
查詢電話：27762774（匡域旅遊）
至啱大胃王
秋冬返中國，梗係要品嘗最啱季節嘅野味，呢個肇慶三水團便以野味為賣點，第一日就食鴕鳥、山雞、松子魚等野味，第二日就食禾花雀河鮮餐，享盡各款美食。
團名：肇慶三水美食二天團
有乜行程：七星岩、東方禪林、金鹿園、夜星湖、古城牆、朝天門、硯洲包公祠、三水森林公園賽車場
團費：$88（成人）、$68（不佔床位的小童）（不包括晚餐，夜星湖費用、三水森林公園高卡車費用）
小費：每人每日$40
出發日期：12月24日、25日及28日
集合及解散地點：羅湖
查詢電話：25213677（公眾假期旅行社）