重有唔夠十日就到聖誕節，對於一班德國甲組聯賽球員嚟講當然快樂，因為有一個月假期休息，之但係拜仁慕尼黑班高層都唔放過班球員，諗計避免佢哋係聖誕節後變晒「豬腩肉」！
拜仁班高層就好擔心成班球員會喺聖誕節期間，對住火雞、意粉同啤酒等佳餚美食忍唔住口，搞到體重上升，影響狀態，所以就喺放假前強制性同球員「過磅」，等佢哋喺假期間潔身自愛，保持狀態；教練希斯菲特重警告，如果邊個歸隊時體重超標，就要付出代價，認真唔客氣。
不過，一向鍾意甜食兼拜仁「新仔」嘅波勒唔知係咪想博歡心，第一個舉手贊成呢個制度，話球會咁做絕對正確咁話喎。其實，我求大俠都好贊同呢個做法，話晒都係職業球員，況且拜仁已經冇咗歐冠盃，喺德甲同第二位嘅多蒙特只係相差六分，榜首位置唔穩陣，都係自律吓好啲嘅！
德國慕尼黑1860對試腳嘅中國年輕國腳邵佳一好滿意，𠵱家考慮緊用邊種形式羅致旗下。聽講邵佳一所屬嘅北京國安要放人，先要考慮到保障球會利益咁話，未決定肯唔肯畀佢離隊。我求大俠當然希望國安成人之美啦，話晒要追及日韓足球水平，畀球員留洋係大勢所趨，咪當畀個球員多個學習機會囉！
前日幾個英超聯領隊，包括布力般桑拿士、曼城基瑾同「米記」麥卡倫都對球證執法水準好唔滿意，話自己隊波球員唔應該攞紅牌、要判十二碼等等。其實，我求大俠睇電視直播都見到韋斯咸前鋒迪科，同「米記」尼美夫嘅入球都無越位，以職業球證嚟講，呢啲錯都係好大意，唔通聖誕假期就到會影響球證執法水準？
英格蘭足球最近可謂喜訊連連，有關方面決定續簽電視轉播新合約，各間英超球會總共可在三年內獲得約十六億英鎊收益，真係恨死隔籬！另外歐盟亦會喺○四年多咗十個包括捷克、斯洛文尼亞、波蘭等東歐國家在內嘅新成員國，亦即係話英格蘭球會從此可以免除喺呢啲國家簽入身價較低嘅優質球員時，要申請工作證嘅煩惱，睇嚟英格蘭足球嘅發展真係會愈來愈蓬勃！
早幾日網壇大美人古妮高娃同佢嘅情歌王子男友Enrique去倫敦嘅歌劇院欣賞歌劇，本來係件開心事，點知向來自命不凡嘅古妮高娃，因為自己冇份喺節目後同英國皇儲查理斯見面而大發雷霆，重質疑負責人點解自己個名唔喺會面嘅嘉賓名單上。最後呢位俄羅斯甜姐兒梗係唔得逞啦！睇嚟古美人重未明「面係人哋畀，架係自己丟」嘅道理！