黎智英上周返港，嚇咗公司同事一跳，事關佢坐住輪椅返公司，又篤住支三腳叉喺寫字樓四圍行。原來佢騎馬跌親受傷，於是大家都諗，肥佬做咗「鐵拐黎」，究竟會唔會去遊行？
噚日去到維園，太多人，八方搵咗好耐先見到肥佬同尊子、陳也等一齊行。
揹住個大背囊嘅肥佬話：「因為喺粉嶺墮馬，隻腳今日重有少少痛，不過我都嚟表達對二十三條惡法嘅不滿。」佢話二十三條好似一個無限金剛圈咁，除咗綁住傳媒機構，妨礙新聞自由，亦都限制普羅市民嘅人身自由。「今日見到咁多人支持，好開心，希望政府諗吓係咪要出白紙草案。我唔會改變辦報方針，俾佢拉好過！」
八方見好多人拿住《蘋果》昨日嘅特刊叫肥佬簽名，都冇問佢隻腳點；佢行得咁快，一定冇乜事啦。
（圖）肥佬黎（右）早前騎馬跌傷，要坐輪椅，不過噚日遊行時已經好番好多。 黎樹雄攝
傳真︰2623-9278
電郵︰