美伊局勢緊張，美股再跌，油價又升。短期形勢，油股有利，昅住啲油輪可也。3大油股中，中石化（386）近日走勢最勁，升幅唔細，3周升幅達1成半，相關Call輪數據雖然唔錯，但交投唔多買賣唔易，而且驚正股升得太多再升水位有限，所以暫時唔打佢哋嘅主意。
可留意中石油（857）同中海油（883）嘅相關Call輪。中石油與中海油近期升幅小，未反映油價上升對佢哋帶來嘅刺激。中石油輪揀9232同9361。9232明年11月夠鐘，現價18仙，溢價10.6%，槓桿率8.6倍；9361明年6月到期，現價11.5仙，溢價5.5%，槓桿率13.5倍。9232交投較旺，有21球易手，溢價雖然唔低，但壽命夠長，槓桿率亦唔細，補番數。
中海油Call輪得隻9299啱買賣，明年3月夠鐘，現價4.5仙，溢價9.6%，槓桿率21.8倍，買賣易。隻輪溢價唔低，不過勝在槓桿率高，交投又多，輪價每跳1跳，就係2%以上，日中炒上炒落，能夠成功按排隊價買貨同賣貨，已可以有一盅兩件嘅利錢落袋。
另外隻Call輪9511，明年4月夠鐘，雖然槓桿率去到54倍，但溢價24.3%高得滯，若然正股牛住，隻輪溢價收縮，好易輸錢，唔啱玩。
章盛