噚日《信報月刊》老總文灼非同中大出版社嘅黃小華小姐大喜之日，撞啱反《基本法》二十三條大遊行，好多行家都要兩頭走，漫畫家尊子同老婆陳也就係因為要遊行到尾，所以拜託八方去恭喜一下。酒會下晝三點九喺香港遊艇會舉行，新娘子要補妝，大家就先睇吓短片，港大校友特別係徐詠璇最開心，因為一對新人都係港大畢業，返校園由行家波比影嗰輯相好有味道。《信報》大老細林山木夫婦同埋太子女林在山當然有嚟，愛將娶妻，佢哋非常高興。
噚日嚟賀文兄嘅嘉賓不少係文人雅士，作家及評論員，陸鏗夫婦專程由台來港，還花了四萬新台幣購下一幅文兄老祖宗文徵明後代嘅墨寶送畀一對新人，陸老重高歌一曲《綠島小夜曲》贈興。
另外一位貴賓係信興老闆蒙民偉老先生，佢話，《信報》上下都係佢老友，佢一知道八方喺壹集團打工就怕怕，話怕偷影喎；不過，佢都好大方畀八方同佢哋拍照留念。
（圖）文灼非（中）同黃小華（左）大喜日子喺遊艇會擺酒會，蒙民偉到場祝賀。
傳真︰2623-9278
電郵︰