上星期已同大家率先介紹過喺舊啟德機場舉行嘅「環球嘉年華」，不過，由於當時機電處未出牌，所以就只能有得睇冇得玩，終於等到上星期六正式開幕喇！面對滿街刺激好玩嘅機動遊戲，同成萬隻人咁高嘅公仔，樣樣都要錢，點樣先玩得激玩得叻？不如問吓現場觀眾，睇吓佢哋認為邊款遊戲先最抵玩、邊個攤位最易攞大獎先！
記者：劉耀祥 攝影：梁世權
逢星期一、三、五刊出
「環球嘉年華」淨係機動遊戲都已經超過50種，如果要全部玩晒，唔係擔心你個荷包，重擔心你個身體頂得住冇。因為場內大部份機動遊戲都以「拋」、「擰」、「Fing」為主，當你玩得三五款之後恐怕已經要攬住個嘔吐袋。所以要搵番幾個至正至多人玩嘅，先為之玩得出色、玩得精叻！
代幣：3個
刺激度：8.5
呢個飛天過山車（EuroCoaster）絕對冇花冇假，皆因其座椅設計成雙腳懸空，兼且重要喺50米高嘅路軌上飛來飛去，兩隻腳喺半空Fing嚟Fing去，都咪話唔驚，但亦可以一邊欣賞會場景色，可謂一舉兩得。「夠晒高，可以睇吓風景，而且衝力都好勁，若果可以再整長啲或者玩耐啲就更加好。」Stephen及Candice說。另外，最搞笑係當過山車Fing緊急彎嘅時候，有乘客話有點點水飛出嚟，但架車又冇濕，唔通有人驚到……
Stephen及Candice覺得可以整長啲就更加好，不過𠵱家都好刺激。
代幣：3個
刺激度：9（10分至激）
好多人都推介呢個為至激之選，不過「Evolution」玩法就與「Revolution」大大不同，但基本都係靠個「Fing」字，而「Evolution」就可以玩足360度，自轉再加公轉，成個巴黎鐵塔反轉再反轉咁，而且足足Fing成3分鐘先放你落嚟，等你可以盡情嗌餐飽。「30蚊都抵玩，可以Fing咁耐，梗刺激啦！不過都頂得住嘅。」楊先生及鄭小姐說。
楊先生及鄭小姐認為30蚊，上去嗌吓都好。
代幣：3個
刺激度：8
後生仔最鍾意就係刺激好玩，就連呢班中四學生都話「Revolution」勁，可見都的確係有啲料到，而且睇吓圍觀人數都知「Revoluton」有幾激，每次開動都引來數十人圍觀。再加上隻船轉到上3、4樓咁高，再狠狠地跌番落嚟，食飽嘅就千祈咪上去喇。如果唔係再加埋強勁嘅音響及噴水效果，分分鐘一路玩一路嘔就唔好啦。「都真係好激㗎，已經轉得好高，重要俾水噴濕晒，10分係至激嘅話，佢都有8分㗎！」海狗說。
（左起）Calvin、Sam及海狗一致推介「Revolution」，一個字講晒「激」！
場內每個攤位都掛晒人咁高嘅公仔，唔單止細路仔睇到鬼殺咁嘈，女仔睇見都心郁郁，咁身為男友又係出手贏番個送畀女伴嘅時候。但邊檔最易贏？睇吓咪知囉，到時就可以喺女朋友面前威威啦。
代幣：2個（3個波）
玩法：將籃球撞板後再跌落籃內，只要中一個就有大獎。其實個波都幾彈，所以用拋嘅方法就可以大大增加入籃機會。
代幣：2個（4支鏢）
玩咗1次掟飛鏢就贏到大大隻公仔嘅Kelvin（右）同Wing，手上嘅戰利品都只係用咗60蚊。
地點：前啟德機場停機坪
日期：12月14日至2月9日
開放時間：平日1:00pm-11:00pm
周末、周日及公眾假期提前至12:00pm開放
平安夜、除夕及年廿九延長至1:00am
費用：免費入場，代幣每個$10
交通：七條免費穿梭巴士路線（包括九龍灣德福、屯門、元朗、上水、大埔、將軍澳、西九龍）
穿梭巴士查詢電話：28826223