看完《無間道》後的心情與當日看完BlackHawkDown後一樣，沉重得很，正正是因為《無間道》是一齣很好看的電影，有極強的感染力，劇情徘徊在甚麼是正？甚麼是邪？正最後能否勝邪之間？電影的結局像一塊鉛石壓住觀眾的胸口。
喜歡看演技的觀眾毋須猶豫，《無間道》值回票價有餘。四位影帝各有發揮，同場時更見張力，角力發生在眼神之間。劉華sharp、偉仔斂、秋生穩、志偉露，四位影帝，四種發揮。由於劉華與偉仔要肩負推進劇情的責任，益發顯出秋生與志偉每出場便有大事發生，所以兩位後者份外顯眼。意外驚喜是阿澤的棉裏針，外邊軟腍腍，裏邊拮得應，觀眾散場時肯定會記得儍強一角。好耐冇見過咁多識做戲嘅人一齊做戲，稍為唔識做戲嘅，一泊埋去即死。
香港影圈久矣未有喜事發生，亦久矣未有令香港觀眾驕傲的事發生，《無間道》應是及時雨，重新令香港觀眾覺得港產片原來都幾型，繼而覺得原來做香港人都幾型。
來屆的電影金像獎，《無間道》相信全部有份提名：男主角、男配角、編劇、導演、最佳電影、音效、主題曲、攝影、剪接，尤其係音樂一項，睇嚟都袋咗大半個獎落袋，唔信就買飛入場睇吓，冇呃您！