今日，清早起床，你可能會聽到一把聲音：「走！下午去維園遊行！」
民間人權陣線過去一周派出兩部流動車，在大街小巷不停廣播，呼籲市民參加今日在銅鑼灣維園舉行的反對《基本法》第二十三條立法群眾行動。天主教香港教區主教陳日君今日兩點會現身維園銅像前主持祈禱會；三時，民間人權陣線會帶領市民由維園遊行至中環政府總部。發言人蔡耀昌表示，遊行全程約兩個小時，歡迎市民沿途加入。
蔡耀昌預計有五千人參加遊行，他相信「參加六四遊行的人都會參加反二十三條遊行」，他們沒有忘記有人曾經以國家安全欺壓人民。他覺得市民有千百個理由要參加今日的遊行：「捍衞自由人權」、「正如陳日君說：『我們不大聲吶喊，我們將會後悔！』」
香港是中共主權下唯一一處地方，市民可以自由上街高呼反對二十三條立法。「走！下午去維園遊行！」聽清楚，正是你內心深處的吶喊，是權利，也是責任。
請聽一聽反對立法人士的心聲……
民主黨前主席李柱銘︰ 「唔好理今日係好天定係落雨，起來，不願失去自由的市民──維園見！」
天主教香港教區主教陳日君： 「我未必有資格呼籲市民參加遊行，但聽日（今日）兩點維園有一個二十三條立法嘅祈禱會，我已經呼籲教友參加。我對二十三條過去講咗好多，立場好清楚。」
香港大律師公會主席梁家傑表示： 「政府今次立法建議完全超出《基本法》二十三條立法嘅要求，喺建議中有好多地方會損害香港人所享有嘅自由同人權，所以大家要表達唔能夠接受呢個立法建議嘅訊息，應該支持遊行。」
香港社會工作者總工會會長張國柱： 「社會服務機構經常都會同外國團體有接觸，二十三條立法之後，我哋可能會中招，雖然有好多社工星期日都要返工，但係我已經提咗同事喺今日參加維園大遊行，反對二十三條立法。」
支聯會主席司徒華： 「八九民運我哋支援北京學生爭取民主，今日我哋更加要企出嚟捍衞香港民主自由……唔介意人數多寡，重要嘅唔係數字，係自己態度、係大家嘅心。」
理工大學通識教育中心首席講師史文鴻： 「自己一定會參加，二十三條立法踐踏言論自由同人權，市民一定要走出嚟講出自己嘅心聲，如果唔係政府會傾向施行暴政，呢個大家都唔想見到。」
香港專上學生聯會代表會主席馮家強： 「苛刻嘅二十三條一旦立法，會影響學生嘅學習及學術自由，學生作為社會的一分子，未來就要承受呢條打壓人權法例。喺呢個關鍵時刻，學生應該參加，就算抽兩個小時出嚟也是值得！」
記者協會主席麥燕庭： 「記協罕有打正旗號遊行，對上一次係八年前明報席揚事件；二十三條立法影響層面更大，希望傳媒行業人士企出嚟，中方陣營遲啲會搞支持立法集會，若果人數相差太遠，政府就會肆無忌憚立法。」
教協會長張文光︰ 「教師係人民良心，涉及到人民大眾人權自由事情上，唔只喺課堂上講，更加要走上街頭捍衞……今天教師沉默，等於助長明天人權自由被剝奪，影響唔只係今日，還有明日；唔只係自己，還有自己嘅學生。」