黎明噚日喺元朗崇正新村，再為公益金百萬行廣告執導同主唱新主題歌曲。黎明話為咗營造寧靜嘅效果，所以喺鄉村取景，重特別搭咗一間假村屋。唔知黎明係咪經常做善事，有上天庇佑，當佢完成晒拍攝工作，坐喺一旁休息嗰陣，喺攝影機旁嘅一棵大樹突然俾大風吹冧咗，好彩冇人受傷，而現場幾位大隻佬工作人員亦立即把棵大樹扶起。
而拍攝認真嘅黎明，為咗拍得最好嘅效果，重不時好細心咁教小朋友做戲，而且佢重可以為咗一個鏡頭，不斷要求班小演員跑來跑去十幾次後，先至畀佢哋休息。
而早幾日，舒淇接受傳媒嘅訪問，佢話最唔鍾意搵虛偽嘅男仔做佢男朋友，同佢經常傳緋聞嘅黎明，就話無論男或女都應該坦白，佢話：「男女都應該坦白，世界先會變得白。」
採訪、攝影：王連連
徐子淇、繆非臨、陳小韻等噚日喺尖沙嘴為「新太陽廣場冬日仙子時尚show」行catwalk，陳淑蘭話佢以超平新人價首次行騷，狀態大勇。而徐子淇就啱啱喺英國返嚟，佢話喺英國讀書生活樸素，冇化妝、冇扮靚，而佢最大嘅滿足係來自睇音樂劇，佢話：「有一套劇，一開場就有個黑人大隻佬跳出嚟，佢淨係着條T-back，好肉酸，好得人驚！」
余文樂噚日喺尖沙嘴HMV，為自己嘅寫真集搞簽名會，重坐住軍車出場，好鬼有型。對於舊女友盧巧音前日俾記者問有關佢哋分手嘅事，盧巧音即刻叫記者唔好再提。余文樂噚日亦好維護對方，佢話：「畀我都惡啦，都講咗半年重要提，都過去咗啦，畀啲空間佢，唔好再勾起啲話題喇！」
陳文媛（BoBo）噚日同譚詠麟、曾志偉、阿叻等，去銅鑼灣出席EO2成員Otto嘅生日會。噚日有報道話BoBo前晚出席一位長輩嘅喪禮時，表現得好唔開心，懷疑同日前BoBo緋聞男友陳冠希同新歡周麗淇拍拖睇騷有關。喺活動度譚校長重搭住BoBo膞頭咬耳仔安慰佢，BoBo委屈咁話：「邊個去殯儀館會好開心㗎？」
蔡國權上個月喺東莞發生車禍後，雖然已經送返香港威爾斯醫院治療，但目前佢重未甦醒，有報道話佢可能會半身不遂，而佢好友肥媽噚日喺啟德大笪地出席環球嘉年華時，就話自己近排太忙未有時間探佢。不過肥媽就話蔡國權嘅傷勢並唔樂觀，但佢執番條命，已經好好彩。