港股無方向，啲熱錢因為要搵股份泊岸，所以近排啲細價股特別旺場。不過自從接連出現細價股爆煲，加埋市場傳聞較早時陸羽單案，係同股票爆煲有關，所以上個禮拜即使有人要郁啲二三線股份，都係喺無乜成交下起飛，升起上嚟都好似無乜力咁。好似上個禮拜提過話有料到嘅文化傳訊（343）咁，上星期郁咗兩郁，買盤又再縮番晒。
不過，唔少行家話上個禮拜收到由公關公司發出嘅文傳邀請信，話今個星期一會有個產品技術合作交流會，宣布同IBM成功研製嘅中文晶片，雖然隻晶片未知好唔好賣，但班大戶已經餓咗好耐，今次喺有實際公布下相信會有番啲動作。
不過睇番文傳班大戶過去嘅手法，隻股絕對唔係直升機格局，各位炒家上車可能隨時被「Fing」到七彩，所以要買呢隻股仔嘅朋友，一定要捱得風浪至好上車。
舊年因債務纏身而被停咗牌成年嘅股仔慶豐集團（661），由於已經搵到白武士同埋得到債權人承諾以股代債，終於逃過清盤嘅厄運，而且重會喺呢個星期一復牌。聽行家講，隻股會進行200股合1股，重會大幅削減股本，喺搞掂重組之後，前大股東嘅權益，喺大量發行新股下已經俾人攤薄到唔夠百分之一，新投資者按全面攤薄計算，就持有超過九成六嘅股份，超過晒港交所嘅流通性要求，肯定要停牌兼批股畀獨立第三者。聽講幕後班大戶係有「財力」人士，今次批股只會益番自己友，唔會有好多貨流出街，加埋合股之後街貨只係得番二千零萬股，要推上去一啲都唔難。不過話晒隻股都係啱啱康復緊，要揸要沽都重係要睇住個市嚟做人。
伏勝