我羅拉有時都幾睇唔過眼，日本啲音樂頒獎禮，永遠係邊個畀面出席就有獎，搞到啲得獎名單熟口熟面。我呢排都唔知第幾次見到濱崎步、中島美嘉同島谷瞳平排一齊攞獎，不過步姐依然交足貨，喊到好似「香港喊包之后」楊千嬅咁樣！
前晚全日本有線音樂放送協會搞咗一年一度嘅「第三十五屆日本有線大獎」音樂頒獎禮，步姐隻歌《Voyage》，又好似十一月嘅「ALLJAPANRequestAward」咁，攞咗全晚最大嘅獎，成為繼森進一、澤田研二同鄧麗君之後，史上第四位連續兩年攞呢個獎嘅歌手。同時步姐今年所有推出歌曲嘅點唱紀錄總共達十一萬一千次，所以佢又攞埋「最多點唱歌手獎」。步姐演唱得獎歌曲時，又係大粒大粒眼淚咁跌落嚟，真係易喊過未戒奶嗰啲BB！
另外兩位新人王中島美嘉同島谷瞳，分別獲得「最優秀新人獎」同「最多點唱歌曲獎」，差啲連個獎名都同「ALLJAPANRequestAward」一樣。
試問咁重複嘅頒獎禮，重邊會有人鍾意睇？以前步姐喊親，第二日報紙都會做頭條，但噚日啲報道全部都係細細單擺喺角落，我諗啲電台電視台都係時候諗吓，第二年重係咪步姐一人撐場就掂。