近月，本港地盤工業意外頻生，四十二歲的冼木根及三十七歲的曾憲業為了養妻活兒，分別從事地盤散工，賺取微薄收入，詎料，二人在工作期間意外身亡，遺下孤兒寡婦，生活無依。日前，兩個貧困家庭喜獲讀者慷慨捐款，助紓其經濟壓力。
「估唔到有咁多熱心人士幫助我哋，感到好開心，𠵱家生活開支暫時都係靠帛金同埋親戚幫手，呢筆善款除咗基本使用之後，其餘全部會儲起，留番將來供兩個細路讀書。」冼太連聲感激地說。
冼木根夫婦結婚二十多年，育有兩名分別十二歲及六歲的兒子，阿根從事地盤散工多年，乃家庭的經濟支柱。惟受經濟不景影響，阿根經常出現開工不足情況，經濟十分拮据，冼太便在熟食檔當兼職侍應，幫補生計。
月前，阿根喜獲安排開工，怎料工作期間意外跌落電梯槽底喪生。生活貧困的冼太，欠費殮葬亡夫。有見冼家的經濟苦況，蘋果日報慈善基金即時從「殮葬專戶」撥款一萬元，以解燃眉之急。此外，冼太另接獲讀者捐款四萬零九百八十元。
「人都去咗，自己都睇開啲，但係夜晚成日都會瞓唔着，𠵱家全部精神都會放晒喺一對仔身上，希望佢哋畀心機讀書，生生性性。」冼太說。
捐款編號：C0714
「收到呢筆捐款真係好意外，老公突然間死咗，生活再冇依靠，惟有慳啲使。個仔部電腦壞咗，希望用啲捐款買部新嘅畀佢學習用，遲啲新年或者買多件衫，剩番嘅錢會留起嚟供佢第時繼續升學。」三十五歲的曾太由衷地說。
三十七歲的曾憲業乃家庭的經濟支柱，曾任職維修技工多年，數年前，他因公司倒閉而轉行從事地盤散工，每月收入不穩，月前不幸在工作期間飛墮電梯槽身亡，遺下妻子及一名十三歲兒子，孤苦無依。
蘋果日報慈善基金了解曾太的生活困境後，即時從「殮葬專戶」撥款一萬元。近日，她獲讀者捐款三萬三千四百五十元，助其度過經濟難關。
「讀者咁關心我哋，梗係好開心，早排我都未接受到呢件事，經常要睇中醫食藥先瞓到覺，呢輪心情平復好多，仔仔都好聽話，重成日會安慰我；𠵱家希望搵番份工做，有份精神寄託，唔使一個人坐喺屋企咁悶。」曾太說。
捐款編號：C0692
暖流熱線
電話:29908688
傳真:23702192
電郵:
網址：