吃辣鍋，總有點攞苦嚟辛的意味，嗜辣之人總愛自殘，但在天寒地凍的情況下吃辣鍋，總算自殘得有價值、有點「食」之成理。不過還是事先警告好，以下推介的辣鍋，辛辣程度分三級，唔想食到味蕾失去知覺兼口水鼻涕流，請量力而為！
眼觀，寧記的麻辣火鍋湯底似無乜料到；鼻聞，辣味卻異常「攻鼻」；試味，直接點，飲一口，感覺就似湯底顏色──辣到火紅火綠，勉強嚥下，腹腔有強烈刺熱感。
鴨血、豆腐、大蒜、花椒、八角、豆瓣醬、辣椒粉
問負責人有何特別配料，佢話無乜特別，只是多食內臟。肥豬腸賣相一般，烚熟一咬滿口油，果然夠肥，難得唔韌，無話𡁻極唔完。
老實講，烚到變紅的牛肚與街邊五皮一串的牛雜無分別，但論口感、入味程度，街邊Cheap嘢當然無得揮，至少無話黐牙兼辣得嚟無咁假。
「我平時都幾鍾意食辣，叫幾食得辣啦，但都食到我標晒汗，𠵱家喉嚨重好似火燒咁㖭。」
驚腸胃唔受得辣，宜先隊杯木瓜奶打底；甚麼配料也好，入口前「過冷河」，先浸浸由2份麻油、1份白醋再加蒜花的「解辣醬」，可中和辣味。
電話：28340998
地址：銅鑼灣波斯富街24至30號寶漢大廈3至4樓
座位：250個
營業時間：中午12時至凌晨4時
收費：自助火鍋因應入座時間收費，每位$48至$88不等，另收茶芥$10。
齋望，驚嚇程度爆燈，血紅色的湯底勁稠，加行火，見滿鍋辣椒隨着裊裊輕煙翻來覆去，以為煲緊辣椒醬，老闆連忙解釋：「唔使驚！顏色恐怖啲啫，我哋已經調低咗辣度嘞。」沒騙人，一試，無想像中這麼辣，算中辣貨色。
五加皮、良蔞干、芫荽子、大茴、小茴、海草、草扣、甘草、益母草、孜然等26種香料再加勁多紅辣椒、燈籠椒、指天椒。
黃喉即是豬喉管，一熟即變腍身，勁入味，一咬辣汁狂標，小心燙嘴。
初以為是闊身菠菜麵，原來是用薯仔加麵粉搓成條狀的薯粉，勁滑勁飽肚。
豬天梯即是豬上顎，未烚前白雪雪，上水後火速變色，辣得嚟彈牙爽口，口感似墨魚片。
「唔算辣，頂得住，我最鍾意薯粉，好似食緊辣味意大粉咁，好正。」
飲老陰茶（右）或苦丁茶（左），平時飲味澀帶苦；辣到舌頭發麻時飲，味甘涼，有潤喉感覺，唯一缺點係要預早沖定，攤凍先有得飲。
電話：23825288
地址：九龍城南角道44號地下
座位：80個
營業時間：下午4時至凌晨4時
沙嗲湯底$20（下）
呈啞黃色的是沙嗲湯底，深紅色的是冬蔭功湯底，一黃一紅，論辛辣程度不過爾爾，不過勝在夠香，一索，你已經Feel到陣陣辣香，最啱非「嗜」辣的「試」辣者。
冬蔭功湯底用香茅、南薑、檸檬葉、青檸、紅辣椒、大葱加泰國辣椒油調校而成；沙嗲湯底更簡單，一樽泰國沙嗲醬溝咖喱粉放落滾水即成。
建議用冬蔭功湯底，因沙嗲會蓋過蝦的鮮味。放心！只要湯底夠滾，蝦膠快熟，見蝦身轉紅即食，免得烚過龍變蝦米。
食象拔蚌唔一定要蘸Wasabi當刺身食，係咁意拖一拖、淥一淥就灼得熟，象拔蚌與辣湯出奇地Match。
大大隻田雞腿，肉勁嫩，入口多汁，至啱食肉獸一族。
泰式火鍋指定配料，試吓無壞，不過南瓜片頗硬身，灼好耐先腍，入口辣之餘重勁甜，盞鬼！
「湯底好香辣味，辣度適中，至啱我呢種貪得意又鍾意試新嘢嘅人。」
冰凍泰國花茶，極具清熱解毒功效，顏色與味道勁似利賓納，味帶甜，入口清涼兼潤喉。
電話：23828671
地址：九龍城啟德道38號地下
座位：24個
營業時間：晚上6時至凌晨1時半