時近聖誕，中環一啲寫字樓連商場，已開始播放應節聖誕歌曲。提醒咗左丁山喺CD架上執番一啲聖誕歌出嚟，演唱者不外乎冰歌羅士比、法蘭仙納杜拉、維也納兒童合唱團之類，只有一張係好獨一無二嘅中文、重係廣東話唱㖭，或者你都估到，就係創作界鬼才黃霑嘅得意傑作——慈祥鵬過聖誕。黃霑既可寫出《獅子山下》嘅香江不朽名句，又可以構思慈祥鵬。呢位仁兄想像力之豐富，令人嘆服。今日有一啲在梁富華口中患上憂慮症、驚恐症、妄想症、選擇性失憶症、老人癡呆症（或病態聖徒）嘅人士上街示威反對基本法二十三條立法，不妨一路行一路聽「慈祥鵬過聖誕」，給自己打打氣，也可用嚟應付突發性突如其來嘅警方貝多芬音樂。
廠家L在內地設廠，患上咗選擇性失憶症，唔記得有慈祥鵬呢回事，但就記得黃霑大師有新傑作，佢打電話嚟話：「我睇過你嗰篇《歌星喊價高》，深有同感，搞職員聯歡會搵歌星唱四十分鐘十首歌左右，的確成本好貴。我照搞聯歡會，只提供麻雀耍樂與抽獎，另外話畀啲職員聽，如果佢哋要聽歌，可睇黃霑做藝術總監嘅《麗花皇宮》，最貴張飛都只係四百八十蚊。聽齊三十首歌兼睇戲。有沈殿霞、葉麗儀、陳潔靈、夏韶聲、葉振棠、雷安娜、劉雅麗、關菊英，全部唱家班，包保唔係雞仔聲。我計過，就算有五十個員工要聽，公司都只係畀二萬四千銀，抵到爛啦！」廠家L果然識計算成本效益，抵佢發。