因種種問題而一再延遲推出嘅全新紳寶9-3車系，展現眼前嘅一刻並未有令人失望，看來要較上一代更具時尚及活力感；或許基於針對龐大嘅北美市場需求，予人一新耳目嘅9-3，摒棄傳統掀背三廂式組合，一份脫俗嘅獨特個性，馳騁於正值嚴冬嘅瑞典Goteborg雪地上，給人看得灑脫有貴氣，究竟部車有幾正？不如就趁此機會先睹為快啦！
記者、攝影：陳偉林
過往，車身線條予人低斜嘅紳寶9-3車系，踏入21世紀可謂一改傳統，輪廓變得圓闊流暢之餘，車頭成弧形結構，匹配粗豪嘅電鍍鬼面罩，以及左右一對扁長嘅Xenon頭燈組合，看來炯炯有神別具動感，而平直式鴨尾狀車尾設計，給人有寬闊後視範圍外，闊大尾燈及High-mount煞車燈鋪排，重有易於察看嘅好處㗎。
車廂鋪排亦見煥然一新，以人體工學設計嘅駕駛艙，四周按鍵有隨手可及嘅特性之餘，屬第2代有護脊及頸椎功能嘅前排SAHR2仿桶形座椅，更給人妥貼富承托力，加埋給擴闊後嘅車廂設計，給置身其中嘅乘客有一份愜意體驗。再者，除四門一按式電窗、門邊電鏡連廣角配搭，重有原廠高級CD音響、左右獨立恒溫冷氣同免提電話裝置、新增頂置行車電腦顯示，同埋不可或缺嘅前後六個安全氣袋連充氣簾幕，更稱得上係一應俱全㖭！
新款9-3車系備有三台引擎選擇，而率先抵港嘅會係配備一台2.0公升直4Turbo偈嘅Vector版本，重有新加入嘅5前速半自動波系統，以其稱著嘅低轉高扭力輸出，可謂毋庸置疑外，廠方重點推介嘅四連桿後懸掛設計，今番響鋪有薄冰嘅雪地上實地測試，更給人倍添有可靠嘅體驗，加上電子TCS、ESP，重有四輪碟煞連ABS及EBD裝置，重予人有收放自如嘅安穩性㗎！
響零下五度嘅天氣下，行走250公里殊不容易，雖然四輪裝有雪地車胎，惟如履薄冰嘅滋味，只好教不諳雪地駕車嘅筆者步步為營。而響平均100km/h車速下置身車廂中，竟有意想不到嘅寧靜度，低轉加速有力之餘，懸掛吸震感覺亦見柔韌有力，更曾響現實中體驗四輪斜出飄移，尤幸廠方推崇備至嘅四連桿後輪結構，有可靠循迹性，匹配上多個主動電子系統，更見有一份安穩性呢！
引擎：1988cc直4DOHCTurbo
馬力：175ps/5500rpm
扭力：27.0kgm/2500-4000rpm
傳動：5前速手波，前輪驅動
懸掛：（前）柱式獨立；（後）四連桿
制動：（前）透氣碟；（後）碟式（ABS）
輪胎：205/55R16
GoodyearUltraGrip500
尺碼：4635×1762×1466mm
軸距：2675mm；車重：1510kg
0-100公里：9.7秒；極速：220km/h
新車售價：約港幣28萬起
查詢：福方汽車（25080000）