恒指跌番85點，個別藍籌冇跌。例如電盈（008），雖然尾市1.26元掛賣盤，有1.2球，電腦仍判收1.27元，升2仙。不過，近期炒得好旺嘅電盈Call輪9417，冇跟正股升，反跌17%，收3.5仙。
9417喺3個星期前自從正股急升之後，交投由冷變熱，一度鹹魚翻生，由2仙殺上11仙，升幅4.5倍，昨日亦有650萬銀成交。隻輪明年5月夠鐘，現價3.5仙，溢價44.4%，槓桿率36.3倍。揸呢類高溢價輪，要準備輪價未必跟正股走，去到尾亦要準備完全冇得剩，因為要正股幾個月內再升4成幾，機會好細。過去1星期，電盈冇因5股合1預期變1美金（即併股前股價要有1.56元）而上升，反跌12%，短期走勢就算好番，9417亦因溢價太高而冇着數。如果要博，2仙左右可以諗吓，又或者低價揀9637，呢件係新輪，登場個幾禮拜，明年11月到期，現價15仙，溢價28.2%，槓桿率8.5倍，吼住喺溢價進一步收縮時落手。
中遠太平洋（1199）走勢好怪，最高7.05元，低收6.55元，跌20仙。Call輪9286收19.7仙，跌2%。等正股回落到6.30元，吼啲9286博反彈，到時輪價大約18仙。有兩隻航運籃子Call輪9236同9237，中遠係成份股，完全買唔過。
章盛