朱茵同男友黃貫中（阿Paul）嘅感情好好，每次提起阿Paul，朱茵就笑得甜絲絲，但當一提起舊男友周星馳嗰陣，朱茵嘅態度就判若兩人，面都黑埋。
早幾日，朱茵以嘉賓身份喺南京出席一個當地電視台嘅綜藝節目《非常周末》，朱茵除咗喺節目度獻唱之外，重發揮搞笑本色，戴上眼鏡扮林亞珍，好鬼馬。
喺節目完結後，當地嘅記者圍住朱茵做訪問，並追問佢同周星馳以往嘅一段戀情。朱茵話不想再提起有關佢同周星馳以前嘅感情事，佢甚至連周星馳三個字都唔想提起，只係用「那個人」來代替周星馳個名，朱茵重要求內地傳媒幫佢澄清，佢同「那個人」除咗工作上嘅關係之外，冇其他任何嘅關係。真係唔明白，朱茵做乜嘢要咁介意提起周星馳呢？
盧巧音（Candy）為咗今晚「歡樂滿東華2002」嘅演出，積極練習扮偶像TheBeatles，到時Candy會以披頭女嘅形象出現，重會打鼓同彈結他㖭。Candy話今次表演有好大壓力，所以特別請咗幾位老友助陣，好似音樂人黃丹儀、陳奕迅同一位圈外朋友。
譚詠麟同李克勤噚日喺電視城綵排「歡樂滿東華2002」，阿倫話今年要挺克勤攞到最受歡迎男歌手為止。問阿倫除咗克勤之外，重睇好邊個，佢就話：「其實小春都不容忽視，佢唱歌愈嚟愈有味道，脾氣唔好係佢嘅形象，而另一個就係梁漢文。」問阿倫出年係咪挺小春？佢話：「咁我就要食多啲嘢，補番吓先。」
郭羨妮（Sonija）同溫兆倫噚日喺電視城撐枱腳，重一碟飯兩份食，對於男友以前嘅情史，Sonija就話：「啲嘢都過去咗，況且以前嘅嘢與我無關，佢以前結婚啲嘢都有同我講過，我唔會理其他人講嘅嘢。」不過Sonija就話自從公開咗戀情之後，成日俾人追訪覺得好無助。
關之琳（之之）嘅爸爸關山噚日上晝由救護車接載，轉往瑪麗醫院心臟專科病房繼續留醫，乖女之之探病時亦表現得相當輕鬆。問之之點解兩手空空？佢話：「我嚟睇吓佢想要啲乜嘢，先至去買。」問之之點解爸爸會轉院，佢話：「因為呢度係專科，比較好啲，不過嚟呢度都係休息吓。」