富泰大中華（1226）果然一如經紀陳所料，被證監會抽秤股份異常歸邊。噚日復牌，股價雖然一度跌落最低1.01元，但收市抽回1.08元，冇升跌，成交金額只得426萬元，唔見有任何大型沽盤出現。
富泰大中華公布，在11月7日，主要股東、上市前投資者及另外12名股東一共持有95.74%股權，其餘公眾股東僅持有4.26%。
經紀陳話，費事俾人以為佢係上面所講嘅十二金剛之一，所以避嫌沽咗先。此外，亦唔想再食驚風散，所以雖然蝕咗少少錢，都決定跳車。
另外一隻差唔多時候上市嘅第一亞洲資本（1227），近日升勢持續，噚日再升6.59%，收0.97元，再創上市新高，而且唔係乾升，成交金額有成948萬元。
雖然第一亞洲與富泰大中華炒家係兩班人，但經紀陳話見過鬼怕黑，加上市場傳聞，第一亞洲與富泰大中華情況相似，有機會被監管機構抽秤貨源歸邊，所以都係避之則吉。
慕容小初