講SOHO區，好多人只會聯想起優皮士留連之地，食好住靚講品味！不過當深入了解行人電動樓梯下的SOHO區，你會發覺除一班Trendy一族鎮住這個SOHO外，原來還有老一輩的中堅，一樣奉行SmallHomeSmallOffice的SOHO精神，或者還比年輕一輩做得更好！SOHO區卑利街嘅芝麻婆婆同健力士紀錄遮神，就是這條街上的神話孖寶！舊式傳統生意、新潮流文化同在一條街上，估不到可以咁夾！
在卑利街上售賣首烏芝麻糊的芝麻婆婆（岑婆婆），第一眼望見她，馬上被佢一臉光滑皮膚，同一頭烏黑秀髮吸引着；與小記同行的女伴，都一樣對岑婆婆駐顏之術讚賞不已。
細問下得知岑婆婆原來已年過一甲子的歲數（62歲），在SOHO區一帶亦住了50-60年；儘管面容已開始有點歲月痕迹，不過頭上沒有一絲白髮，實在令人羨慕。
開初小記還以為岑婆婆天生異稟，可以童顏長駐；幾經追問下，才知岑婆婆早在20年前，曾患鼻咽癌而需要做電療，所以有脫髮及白髮的問題；轉捩點是20年前的一次巧遇，有客人因有白髮及脫髮的問題，在求教國內中醫師後得知黑芝麻首烏有療效，所以回港後就搵附近的岑婆婆幫她磨製；岑婆婆一食就是15年，岑婆婆的容顏及黑髮是否因而得以保存，尚待各位有心人驗證。
地址：中環堅道85號廣福樓地庫
岑婆婆的5歲兔兔外表純純，實際上犯事纍纍，雖然惡事做盡，牠卻甚受街坊歡迎！
在卑利街斜路盡頭，除有濃濃的芝麻香，還有人稱「遮神」的何伯；佢嘅威水史唔單止街坊耳熟能詳，喺94年更被列入世界健力士紀錄大全，01年又將無價遮送給香港歷史博物館，佢嘅神話絕對屬世界級水準！
修補爛遮還有市場嗎？小記站在斜路上短短數分鐘，馬上有答案；一位澳洲移民老街坊黎太，千里迢迢特意來到呢條小斜路買把手製遮，她說澳洲風大，手製遮才頂得住！
其實何伯早已可享仔福，但至今仍堅持開檔，只休星期日，為的就是要服務人群：「前排我又造咗80把遮送畀雲南嘅人，做到夜晚都無得瞓，啲仔都叫我唔好做，我話無所謂啦，幫人嘛！」
地址：中環卑利街74號前
營業時間：星期一至五早上11時至下午4時，星期六至下午5時
同卑利街孖寶形成強烈對比的，是斜路落少少嘅LIVING，呢度專玩新潮概念家具藝術，好似最近就搞咗個以「七武器之首」──摺櫈，創作一系列家居擺設。
LIVING原是一間專賣藝術品同家居店，不過舖前劃有一個數百呎的空間，用來做展覽場館。原創者Chris話這批「武器」勁有創意兼鬼馬，例如將兩張摺櫈「層層叠」般升高，變成一張吧枱高櫈；加闊摺櫈面裝上車轆，又成別致的CoffeeTable！
「摺櫈係香港嘅特色，因為香港地小人多，所以幾乎每家每戶都會有摺櫈，對好多人嚟講都好有親切感，可以話係香港設計嘅icon。」展覽期由現在至三月，不過全部貨品只此一件，賣完就無㗎啦！
地址：中環卑利街62A地下
電話：25213623
營業時間：
星期三至日下午1時至晚上9時半
如果問我哪一間店子真的有Soho影子，我會毫不猶豫就答TIFFANNYFLOWERS。位處卑利街長街之上，遠遠就已經被七彩繽紛的花香迷住了，感覺就像置身歐洲小鎮一樣。
老闆娘Tiffanny非常健談，一談到花佢就會滔滔不絕；與花結緣的原由，是因為她的婆婆是種花高手，所以從小就受到感染，不過她從未想過以花為事業，直至八年前，婚後生活一直無憂的她，被老公慫恿她到JoyceFlowers打工，從此就改變了她的生活，打工不久就已經自立門戶，在雲咸街開了一間小舖，直至半年前才搬上卑利街，生意愈做愈大，試過四日四夜通宵趕貨，不過卻自言忙得十分開心。想買花的話，不妨請教Tiffanny，她會很樂意分享她的心得的。
地址：中環卑利街69-71A(三號店）
電話：25263606