李嘉欣前晚穿上價值四千萬元、由二千五百顆鑽石縫製而成的晚裝，為一個鑽飾派對擔任模特兒，豔壓全城。嘉欣還自爆曾有人送上一顆猶如五元硬幣般大的鑽石戒指向她求婚，但她最終未有答允對方。
李嘉欣前晚應JustDiamond和鑽石諮詢中心邀請，為前晚在時代廣場舉行的「夢中情鑽閃爍派對」擔任壓軸模特兒，以「美鑽夢女神」造型亮相。嘉欣身穿的晚裝由二千五百顆、共重六百二十五卡的完美切割鑽石縫製而成，價值四千萬元，全球獨一無二，甫出場即吸引傳媒爭相拍照。
今次嘉欣擔任模特兒，獲大會送贈過百萬元的鑽飾作酬勞，包括一隻三卡重鑽石戒指及一個一卡重的鑽石吊墜。
嘉欣笑說：「我從未試過着到咁閃，我頭先同助手講咗，叫佢喺我後面睇住，我驚行嘅時候有鑽石跌出嚟。大會有幫我買保險，啲保安又會跟出跟入，所以冇乜壓力，但件衫都好重斤両。」
嘉欣又表示早前遊倫敦時，曾在拍賣行看中一隻粉紅色鑽石戒指，售價一千萬美金（約七千八百萬港元）。嘉欣說：「我好鍾意嗰隻戒指，唔係好大粒㗎咋，大概三、四卡，不過俾人買咗。呢隻係我嘅dreamdiamond，不過真係好貴，我𠵱家重努力緊儲錢買。」
問嘉欣若有人送上該粉紅鑽戒向她求婚，她會否答應？她說：「睇吓佢係邊個啦，如果係鍾意嘅人，咁應承嘅成數梗係高啲，但如果唔鍾意，成日見住都嘔啦！」再問嘉欣可曾試過有人送上鑽戒向她求婚時，嘉欣說：「有，但得兩個啫！其中一個送隻戒指好大、好大，我叫對方擺隻戒指喺我度畀我考慮兩日，但未夠四十八小時我就打電話拒絕咗佢。」此時嘉欣做了一個手勢，示意戒指上的鑽石約有五元硬幣大小。
問到為何不答應時，嘉欣說：「呢個男人好有問題，如果我應承，就係鍾意隻戒指多過鍾意個人，純粹係因為隻戒指，咁以後嘅日子就會好痛苦。」
嘉欣表示自己是個理智的人，事實上，李嘉欣入行多年甚少傳出緋聞，自倪震後，親口承認的男朋友只得城中富豪劉鑾雄和模特兒Perry，而緋聞男友亦只得黎明一個。
此外，嘉欣又透露曾收過男影迷送贈的鑽石，她說：「試過有一個男影迷擺低盒嘢就走咗，我拆開先知入面係一粒一卡嘅完美鑽石，但我之後都冇再見過呢個影迷，佢可能去咗還大耳窿嘅債。其實有人送鑽石我都唔敢亂收，因為收咗人哋嘅鑽石，即係畀咗期望人哋。我拍咗六、七年戲同廣告，自己都儲錢買咗隻八卡嘅欖形鑽石，當時等咗成一年先至有貨。」