古語有云：「書中自有黃金屋，書中自有顏如玉」。現效力甲組球隊澎馬流浪的馮嘉奇，去年在英國雖已獲得碩士銜頭，但正所謂學海無涯，「馮奇」考慮既然放不開當職業球員的夢想，又不想在低迷球市蹉跎歲月，倒不如在踢波之餘繼續進修，「降級」入讀港大運動科學及康樂管理學士課程。「馮奇」這種逆境自我增值精神，確是時下年輕人的學習典範。 圖?文：李勇明
記：記者 馮：馮嘉奇
記：你已經有個碩士榮譽（去年完成英國Warwick大學商業管理碩士），點解重要花時間讀呢個港大運動科學及康樂管理學士課程？
馮：讀港大呢個課程，主要係多個保障。我希望將來結束球員生涯時，可以繼續留喺球圈或向體育行政方面發展。
記：呢個課程要讀幾耐？平時又要練波、又要讀書，時間點樣分配？
馮：全個課程要讀三年；基本上現時每個星期有四日要返學，通常上午上堂，下午就返球會練習。至於夜晚，如果唔使教波嘅日子（馮嘉奇目前兼職擔任巨人足球學校教練），會抽時間溫書做功課。
記：目前讀大學學費好貴，經濟方面容易應付嗎？
馮：都幾貴㗎，一年學費要成四萬幾元。不過，好彩自己有獎學金，大概可幫補半年學費。至於剩餘費用同生活支出，咪要靠流浪份人工，同埋兼職教波份糧頂住囉。
記：今年你幫港大踢大學足球聯賽，情況怎樣？
馮：經過兩場比賽，隊波都係打和，出線有啲難度。唔知點解，踢大學聯賽嘅壓力，反而俾踢甲組大，可能因為自己靠踢波攞獎學金，如果港大今年喺大學聯賽成績唔好，自己都好難交代。
記：記得係英國讀完碩士課程返嚟時，我曾經訪問過你，當時你話自己最大心願，就係入選港隊踢○六年世界盃外圍賽，最近港隊公布名單，你榜上無名，失望嗎？
馮：當然失望啦，今次唔能夠入選港隊，其中一個原因就係自己要返學。其實，如果港隊選我，我可能會放棄學業，始終自己最大夢想，就係好似《足球小將》裏面嘅球員，成長後可以幫國家隊踢國際賽。
不知是否感染了「馮奇」這種好學精神，澎馬流浪幾位年輕小將，踢波之餘，俱重披書包上學去。
現年二十二歲、司職守門員的高志超，最近就選讀了嶺南大學的商業基礎副學士先修課程。至於和高志超一同入選新一期港隊名單的後衞文彼得，與流浪隊友張健鋒則報讀專教院夜校課程。
花名：馮奇
出生日期：19/09/77（25歲）
身高：1米75
體重：68公斤
位置：後衞?中場
效力球會：澎馬流浪
曾效力球會：五一七、快譯通、傑志