今年工展會將是最後一次在添馬艦舉行，所以無論如何，都要一到。而工展會另一最令人引頸以待的節目，必數工展小姐選舉莫屬。今年一改評判團評審賽制，改為入場人士投票及參賽者在4個宣傳活動中之表現，繼而選出冠、亞、季軍。9位候選靚女準備就緒，就等你投票。
記者：吳佩璇
攝影：陳盛臣
勇奪「最合眼緣工展小姐獎」
先前街訪個個都揀1號，就知Sheila幾咁有人緣，奪得由傳媒朋友選出的「最合眼緣工展小姐獎」，可謂實至名歸！先拔頭籌，Sheila當然開心，但佢話：「呢個獎我其實睇好6號，因為佢笑容好燦爛。」雖然多人撐，但Sheila是眾佳麗中年紀最大的一個，芳齡31，但佢依然無懼：「工展小姐同一般選美唔同，係為咗推廣公司品牌。我成熟啲，見嘅嘢多啲，我覺得重着數！」
小檔案：
姓名：林惠轉（Sheila）
芳齡：31
代表公司：百草堂健康飲品公司
職位：業務發展經理
阿Yan自我介紹時就話自己鍾意游水，可以一口氣游三個直池。遲啲重諗住學埋跳水，因為個個都話佢個樣似伏明霞！挾着翻版伏明霞的美名，即成傳媒焦點。你又覺得佢似唔似？就連佢自己都話似：「我覺得有7、8成似。但我唔覺佢靚，自己都係麻麻哋。老細叫我參加，我都考慮咗2個星期，當係攞人生經驗都好。」
小檔案：
姓名：沈瑋欣（Yan）
芳齡：19
代表公司：三利隆麵食製造廠
職位：推廣主任
Joey謙虛得嚟又有自信：「我公司10個人得3個係女仔，所以咪搵我參加。最難忘係着住對3吋高踭鞋學行CatWalk，因為我平時着慣波鞋，點知有次唔小心拗柴，即刻去睇跌打，但唔敢敷藥，驚着唔倒鞋！」為了這次比賽，Joey都可說犧牲不少，難怪問有冇信心時，佢話畀自己100分！
小檔案：
姓名：鄧慧慈（Joey）
芳齡：19
代表公司：惠華製藥廠有限公司
職位：文員
1.網上投票：於12月14日至明年1月4日間，登入大會網址，選出心水佳麗，有機會贏取獎品。
2.工展小姐日：想近距離睇靚女，留意以下時段：
－15/12（2:00pm-3:00pm）：工展小姐將在台上介紹公司產品，並由李力持選出「最佳口才獎」得主。
－21/12（2:00pm-3:00pm）：工展小姐攝影日，並選出「最上鏡工展小姐」。
3.總決賽：1月6日，7:00pm-9:30pm，在告別添馬慶功宴中舉行。
香港十大名牌選舉：已選出15個本地傑出品牌，決賽將於明年1月3日舉行。同樣設有網上投票，詳情可瀏覽網頁。
工展會搜影：對攝影有興趣者可於工展會開放期間，前往會場自由攝取場內人和物。比賽設冠亞季各一及優異獎十名。參賽表格可於廠商會中環辦事處、各分區簽證辦事處等地索取。參賽作品須於明年1月10日或之前親自遞交或寄交中環干諾道中64-66號廠商會大廈3樓「工展會」宣傳部收。
兒童繪畫比賽：
12歲以下的小朋友一樣可以參與工展會，以「我眼中的工展會」為題，於12月23日至30日期間，每日下午4時-6時在會場表演台舉行。有興趣的小朋友親臨參賽即可。分初級及高級組，每組設冠亞季各一及優異獎五名。
我們以大會發布的候選佳麗照片，做了一個小型街訪，訪問了15人，出奇地所有人都一致睇好1號佳麗林惠轉！點解？個個都話佢個樣最順眼，即刻聽聽佢哋嘅審美標準！