美國創作音樂人Moby同Eminem嘅牙齒印一向好深，早兩日Moby喺街頭俾人偷襲，重出到鎚仔做「架生」，事後有人話呢班滋事分子原來係Eminem嘅fans！
話說大前日Moby喺美國波士頓開完騷之後，走後門攞車準備返屋企時，有三個人假扮向Moby攞簽名，埋到身嘅時候，就突然抽出鎚仔從後襲擊Moby。
當Moby俾其中兩個人圍毆嘅時候，另一個襲擊者居然自備胡椒噴霧，噴向一名準備去幫Moby手嘅會場保安，狼胎到我羅拉都唔信！
事後呢三位襲擊者當然逃之夭夭，而Moby就即時報警，不過佢當時塊面俾人揼咗幾吓，血流滿面之餘重暈陀陀㖭！入院後Moby要喺塊面度縫針，算係毀咗容。前日Moby喺自己個網頁度發表聲明，呼籲打佢嘅人喺網上留言，話畀佢知點解要打佢喎！