財政司司長梁錦松日前訪問南京，竟然畀咗機會內地嘅《揚子晚報》大做文章，報道佢同「國寶」伏明霞嘅感情同婚姻生活，搞到阿松好唔滿意，透過駐京辦向南京外事辦投訴。
呢單嘢搞到阿松咁㷫，始末係點？作為內地發行量五大之一的《揚子晚報》網上版大篇幅報道，訪問南京嘅阿松喺金陵飯店，接受佢哋記者同江蘇經濟台記者嘅聯合訪問，講到阿松重好樂意談及「松霞之戀」，對愛妻伏明霞讚不絕口，更暱稱佢老婆為「阿霞」。
呢篇報道話喎，阿松自稱與霞女一見鍾情，第一眼就有觸電感覺，而霞女雖然手勢麻麻，但堅持下廚煮飯仔盡老婆責任。報道又話阿松自稱已五十幾歲人，眼見孩子就要出世，好珍惜𠵱家嘅婚姻……
呢啲話佢婚姻美滿嘅報道原本好啱聽嘅，不過最大鑊係原來《揚子晚報》喺度作嘢。財政司發言人同八方講，阿松今次去南京根本冇接受《揚子晚報》訪問，而曾經接受江蘇經濟台訪問之中，亦都只係講兩地經濟合作問題，根本冇提到佢同老婆嘅私生活。
（圖）阿松同小伏兩夫婦私生活雖然好受關注，但大陸報紙都冇理由作嘢屈佢哋。 資料圖片
傳真︰2623-9278
電郵︰