H太嫁得好老公，唔使點做，於是退出銀行界，歎咗好幾年矣。呢日佢出電郵召集一班舊同事聚餐，唔知係唔係大家太耐冇見，竟然好鬼踴躍，一張大枱坐唔晒，要另闢細枱。人到中年，大都開始懷舊，見番吓大家做銀行靚仔靚女跟老闆學師時候嘅朋友，總有一番親切，恢復昔年「童言無忌」嘅狀況。
K太多年不見，仍係當年一副小鬼頭模樣，但一講嚇親，佢位寶貝女已經十七歲，讀緊國際學校，就嚟去美國讀大學，已經唔肯跟佢去街。問K太得閒有乜細藝，佢話：「做美玲姐姐囉？」左丁山不明所以，蠢蠢地問佢：「你幫陳美齡姐姐做事？」眾人大笑，指左丁山老餅過老餅，連「美玲姐姐」都唔識。K太話：「得閒就幫老公送吓信，去吓銀行入數，即係做我哋舊時響銀行班mailing大佬所做嘅嘢。𠵱家好多女士做埋mailing，外號就係『美玲姐姐』。」
K太做女嗰陣，已經不拘小節，整日笑哈哈，𠵱家個女都大咯，更加冇着C牌衫、L牌袋、G牌首飾、P牌鞋，望吓佢，似是鄰家師奶咁親切。K太話有一次帶咗成叠票（支票）上銀行搵老公嘅privatebanker，喺部𨋢度，一位真正美玲姐望住佢手上一大叠信封，眼神表示無限同情，向佢呻一句：「三點幾，我派晒嘢咯，你重咁多嘢做呀！」K太幾乎想大笑，但都係忍住。賓架K係歐資銀行嘅私人銀行部阿頭，對K太話：「因住我哋個接待員唔畀你入嚟！」