英皇3T鄭希怡（Yumiko）、劉思惠和蔣雅文將於下月拍攝新片《可樂煲薑》，本月底又會拍攝新片《愛有一點藍》，在該片中Yumiko更力壓孖T成為女主角，與陳冠希談情說愛。
英皇3T小花鄭希怡、劉思惠（Maggie）和蔣雅文（Mandy），早前曾接下林建岳投資的電影《老鼠愛上貓》，後來因檔期問題而被飛出局，不過林建岳方面將於下月中開拍警匪片《可樂煲薑》（暫名），據悉已安排3T演出補數，而男主角則是黃秋生。
而Yumiko在3T中突圍而出，英皇為替她造勢，特別在本月底開拍新城廣播劇《愛有一點藍》電影版，雖然3T均有份主演，但Yumiko的戲份會比孖T多，坐正女主角之位，與師兄陳冠希（Edison）扮演情侶。
Yumiko在片中飾演大學生，陳冠希則扮演攝影發燒友，Mandy則會與麥浚龍（Juno）大演對手戲，而蕭正楠則正在斟洽中，若卡士落實的話，Juno與蕭正楠這對死敵會再次碰頭。
Yumiko日前在電話中說：「我知公司遲啲會開部戲，有3T同Edison做。我同Edison合作得好開心，早排我哋喺公司演唱會度一齊跳舞，反應都幾好，可能係咁，所以我哋再合作。」問Yumiko擔正做女主角，可有擔心惹來孖T呷醋？她笑說：「佢哋唔會嘅，其實大家都係女主角，戲份差唔多咋。」
原來Yumiko以前曾聲演《愛有一點藍》的廣播劇，難怪今次電影版亦順理成章邀她做女主角，Yumiko說：「係呀，以前我聲演呢個廣播劇，但呢次拍戲嘅感覺又唔同，都有少少壓力。其實我早排至拍完《魂魄唔齊》，咁快又有戲開，所以我覺得自己好好彩。」
採訪：朱芷瑩