關心妍前晚喺理工大學賽馬會綜藝館搞咗個迷你演唱會，今次係佢第一次開騷，所以特別激動，重喺台上面喊咗兩次，去到尾聲嗰陣喊得好犀利，啲歌迷衝晒上台同佢握手，有啲重陪佢一齊喊㖭！
關心妍喺演唱會度狂騷quali，除咗彈琴，重大彈結他同吹色士風，又唱一啲好高難度嘅英文歌，重唱埋陳奕迅同陶喆嘅歌，以顯示自己係實力派，佢喺台上多謝咗一大堆人，話驚喺頒獎禮會講唔晒。而無綫嘅高層何麗全就由頭睇到落尾，似乎好欣賞關心妍。
之後記者問關心妍係唔係對攞獎好有信心，佢話：「都唔係特別有信心，不過我覺得自己做咗咁多嘢，應該都會有嘅，點都會有一兩個獎嘅。」記者指何麗全睇足全場，佢一定攞到無綫嘅獎，關心妍好開心咁話：「如果係就好喇！」
萬梓良噚日同埋大咗肚七個月嘅老婆郭明黎，由肇慶返香港，為亡母奔喪，萬子聽日會為亡母喺沙田設靈，後日就出殯。萬子話：「因為媽咪係客家人，所以都會跟番鄉下儀式，出殯之後會將阿媽嘅遺體運返鄉下寶安落葬。」
關之琳嘅爸爸關山日前喺屋企突然覺得呼吸困難，報警求助後送咗入灣仔律敦治醫院。之之呢個乖女就成日陪住阿爸，噚日佢下午一點幾去完醫院，就由男友黃家諾接送。記者問之之，佢爸爸重使唔使留院，佢只搖吓個頭冇答到，但係據知佢阿爸就仍然留醫。
奀妹（傅天穎）一返台灣發展冇耐，就成為電腦網絡遊戲《新流星蝴蝶劍》嘅代言人，重即席喺記者會上舞劍做宣傳，認真落力。奀妹話遊戲其中一個角色嘅性格同佢好似，所以特別投入，而佢主唱嘅遊戲主題曲，遲啲重會收錄喺佢嘅新碟入面㖭！
羅文前助手Terry噚日出席喺尖沙嘴嘅活動，問佢最近搞緊乜，佢話：「上個月阿媽走咗，要做嘅白事都做晒，嚟緊星期日會幫我老婆搞個Herman'sHermits演唱會，籮記嗰時夾band都係唱佢哋嘅歌，呢隊係六、七十年代嘅知名樂隊。」
陳曉東噚日去跑馬地出席聯合國兒童基金會記者會，早前有報道話栢芝自殘身體，又再紋身，東東就話：「啲人亂寫嘅啫！唔好咁多黑心鬼，寫啲咁嘅嘢，佢個人比較真性情，好投入，可能太投入就諗咗第二啲嘢，畀啲空間佢啦！作為朋友我會支持佢。」