巴塞隆拿對紐卡素場歐冠盃，因為天雨關係延遲一天進行，唔少博彩公司要採取應變措施，其中梳打埠何生嘅「澳門彩票」就值得一讚。
呢場波當時決定改期，好快就有公布話二十四小時後補賽。「澳彩」亦好快就宣布之前已收受所有關於呢場比賽嘅投注，全部繼續生效；唔似平時咁退飛，或者過關當中一倍咁計。由此可見佢哋跟進賽事消息及官方公布嘅工夫做得好足，並無因為賽事深夜進行而有所忽略，或者全交由電腦處理，當取消退飛算數。
此舉就畀到人公平感覺，第時馬會搞賭波，真係要向「澳彩」借鏡，事關有唔少「馬交老友」同我求大俠呻，話佢哋上網幫襯嘅博彩公司及單位都當取消退飛算數，難為佢哋買咗巴塞隆拿讓一球/球半、以及分頭較多嘅贏三比一波膽早飛！
最近有報道話，我哋中國嘅孫繼海愈來愈受英格蘭曼城球迷歡迎，重話佢如果踢右翼衞，球隊就唔會輸，好似佢哋嗰邊嘅荷李活大熱猛片《哈利波特》男主角咁識得魔法一樣。可能我求大俠幻想力豐富啦，見到呢篇報道就諗起「老孫」戴起副哈利波特圓框眼鏡、着起件袍個樣都幾搞笑！
「大頭」李瑋峰日內將會飛返中國，有唔少敏感嘅行家，就報道話李瑋峰喺愛華頓踢唔掂，要提前返國踢番甲A。愛華頓贊助商深圳科健嘅代表即刻話無啲咁嘅事，此行只係療傷。我求大俠就覺得即使今次冇事，「大頭」嘅借用合約就嚟完，加上喺愛華頓連後備都冇，難保下次真係……
最近阿根廷警方喺其中一位叫華加拿嘅入境人士身上搜出毒品可卡因，而呢位華加拿就係最近幫前球王馬拉當拿進行瘦身療程嘅醫生。華加拿就話啲毒品唔係佢嘅，亦唔知點解會喺佢啲行李入面。我求大俠就覺得佢未必係狡辯，啲可卡因可能係有食呢味嘢嘅馬拉當拿都未定，如果係真，呢次俾呢位肥球王害死囉！
前日先睇完「大哥」佐敦同「二哥」柏賓，自從公牛王朝解散後首次同場對壘，可惜已今非昔比，令我求大俠好感觸。點知噚日「前」公牛王朝三雄之一「眼鏡蛇」賀維士格蘭突然俾魔術飛起，被迫告老還鄉。其實佢今年先三十七歲，細過佐敦同柏賓，可惜佢嘅膝傷醫極都冇起色，結果反而要比兩個舊戰友先收山。