郭富城近年來認真時運不濟，事業發展停滯不前外，他與排舞老師Sunny及經理人小美合股開設的餐廳兼排舞室亦生意欠佳。昨日更有該舞蹈班的學員致電本報投訴，指舞蹈班無故停開至今近兩個月，應發還的一千零八元學費遲遲未獲退回。
郭富城與經理人小美等合資七百萬元開設的餐廳StudioWorkshop&Cafe，前年十一月開張以來，除經營飲食業外，餐廳內還設有排舞室，定期開設舞蹈班。
城城老師親授徒
餐廳開業初期，生意不俗，但自去年起受經濟不景氣影響，生意愈來愈差，更出現了虧蝕的情況，不過因餐廳由城城排舞老師親自授徒的各種舞蹈班生意仍不俗，才足以彌補餐廳的虧蝕。但自今年十月中起，該舞蹈教室忽然取消所有課程，昨日更有讀者致電本報投訴，指城城餐廳的舞蹈班結束後，遲遲未退還學費。
向本報投訴的盧小姐於十月初以二千二百四十元，買了一份城城餐廳舞蹈班的套票，可以憑票參加各種舞蹈班。
「真係失晒信心」
盧小姐向本報投訴後，記者即向城城餐廳方面查詢，事後盧小姐即接獲電話通知可收回退款。盧小姐昨日在電話中說：「我用二千幾蚊買套票，佢哋話可以憑套票上二十堂，但學咗一輪，重欠九堂就突然話舞蹈班結束，成個班應該有十幾人受影響。初時佢間餐廳有人通知我哋上去攞番退款一千零八蚊，點知上個月去到只係攞番張退款回條，呢個幾月嚟我不停打電話去追番啲學費，但始終冇回音。」
盧小姐續說：「城城間餐廳話退款受拖延係因為老闆唔喺香港，所以冇人簽支票，直到今日我先至收到佢哋電話，話聽日可以攞番啲錢，又話呢個聖誕會再開番班。但我經過今次事件，真係失晒信心，佢哋再開新班，我都未必再有信心報名參加，因為搞咗個幾月先至可以有錢退。」
唔退款可再上課
而目前正身在外地的小美，昨日透過長途電話回應舞蹈班拖欠退款一事時說：「舞蹈班唔係結束，只係因為個地板要重新更換，所以至暫停一段時間。之前我已經叫公司啲人通知學員安排退款，但𠵱家有人投訴遲遲未退還學費，我經過了解之後，先知係公司啲人計數需時，所以退款手續先會拖到咁慢。」
小美續說：「據我所知，已經有專人通知買咗套票嘅學員上去攞返啲退款，如果學員聖誕後重有興趣學舞，可以繼續參加舞蹈班，冇興趣就畀番學費佢哋。我同城城雖然呢排成日唔喺香港，但聽到呢件事，我已經即刻去了解清楚。」