最近得知喺香港有三十多年歷史的新發茶餐廳進軍深圳，賣點係可以喺茶餐廳食到黑松露菌及黑魚子醬等高級菜式，實行將茶餐廳的飲食新文化搬入內地。為求達到水準，所以不論廚師、茶水師傅、燒味師傅及所有食物用料，均由香港運返內地，務求由內至外都達到港式的水準！
記者：辛汀
攝影：陳奇
原來這味是翁師傅的自創菜式，當然要試。咬開雞卷後，發覺除咗有甘笋及菠菜外，還有由意大利北部出產的黑松露菌，雖然黑松露菌的份量不多，但食落口味道十分濃郁，若果唔鍾意此味道的人士，相信未必會喜歡吃。不過以?50的價錢，能夠在茶餐廳食到如此菜式，還有餐湯及飲品奉送，實在抵食！
翁師傅話伊朗及俄羅斯的黑魚子醬質素最好，不過因成本關係，茶餐廳選用了中國黑龍江出產的黑魚子醬，食落口一試，都算唔錯。鮭魚由加拿大進口，我一向不喜歡食魚，不過在翁師傅慫恿下即管一試，入口無乜腥味，配合埋黑魚子醬，口感唔錯！
十四歲入行，企喺度沖奶茶、咖啡已有三十四年經驗嘅楊師傅話：「我哋沖嘅奶茶，會用五種紅茶攪勻配合，以3的奶配合q的茶，所以特別香滑。」原來楊師傅以前喺尖沙嘴、荃灣、旺角嘅茶餐廳工作過，後來老闆要喺深圳開新店，於是就派他負責茶水部，工作了差不多一個月，已經習慣了這裏的工作方式。
燒味師傅阿光話：「我每日都會親自去寶安嘅農場揀選黑鵝仔，每隻大約有五斤重，太重的話肉質會不夠嫩。晨早醃好、風乾，九點鐘開始掛爐燒烤，每批三隻，賣晒後就再燒一批，咁樣先至能夠保持到燒鵝皮脆肉嫩。」
除咗燒鵝，店內的烤乳豬亦相當受歡迎，每隻乳豬同樣只有五斤重，而且全由專人負責燒烤，師傅話用人手燒烤才會燒得均勻，「每隻大約烤十五分鐘就足夠，太久的話，肉質就會過熟，入口唔夠嫩滑。」
香港的新發茶餐廳，已有三十年歷史，本來是一家名不經傳的普通茶餐廳，在80年代初期，首創24小時通宵營業，隨即一鳴驚人，當時好多尖沙嘴、佐敦道一帶的夜遊人都會去歎茶。到現時為止，全港已有八間連鎖店，老闆見到內地發展飲食業是一個大趨勢，於是用了三百多萬作為投資金額，選定深圳作為試金石，成功的話，會繼續開分店，實行在內地大展拳腳。
新發香港燒臘茶餐廳
地址：深圳羅湖區鳳凰路鳳山大廈10號地下
電話：(86)75525417722
營業時間：24小時