港股噚日牛牛皮皮，恒指上升29點，收報9813，成交41億元。ｉ師傅話，由於美伊戰事如何發展尚未有定案，突然又殺出美國與北韓核武爭議，隨時會令亞洲市場局勢緊張，呢個聖誕可能唔會太平安。
大東近排好似好唔掂，又俾投資者投訴隱瞞稅務支出15億英鎊，股價狂跌，跟住又傳出歐洲方面要裁員65%，市場好順理成章再傳大東要賣電盈（008）股份，令電盈股價受壓。不過，市場同時傳出買家可能係中電信（728），因為兩者關係甚為密切，從中電信上次調高IDD結算費一事就可見一斑。本港眾多IDD營辦商即刻要加價，只得電盈定過抬炸彈，反映兩者之合作關係非比尋常。加上兩間公司都係經營固網，業務相當接近，問題只係中電信肯唔肯做小股東。
國新集團（1215）噚日復牌股價勁升逾倍，收0.204元。黑客話，因為受公司配股效應影響。國新公布以每股0.10元配售6.24億股，主要透過證券行以盡力方式配售，即係話股份重未完成配售，若市價仍然維持在0.10元水平，又點可以吸引股民認購，股價噚日炒高逾倍，吸引力當然大增。市場傳出，已有數名大戶各自認購數千萬股。不過據阿虎所知，認購情況其實唔算好理想，而且配售情況亦非如傳聞所講，已由數名大戶包起。據講重要將股價踢高，吸引散戶認購，貨源可能會散通街。
此股過去每日只得幾十萬元成交，噚日宣布配股才有6000萬元成交，若大手認購，真係要小心日後搵唔到人接貨。另外，新股最遲可能要等到1月18日才會交到客戶手上，認購者不能即時沽貨，在獲得股份時，股價可能面目全非，所以認唔認得過，真係要三思。
阿虎