有指鄭秀文（Sammi）一直不滿楊千嬅，尤其千嬅近年在影壇上位，與她一樣走儍大姐路線，有搶飯碗之嫌。Sammi卻大讚千嬅開朗勤力，又否認曾表示不願與千嬅的男拍檔合作。提到趙頌茹，Sammi則興奮地表示對方與自己真的幾可亂真。
坊間一直有傳鄭秀文十分討厭楊千嬅，除不滿她出道時以「翻版Sammi」作宣傳外，近年千嬅電影及歌唱事業又不斷上位，尤其在電影方面「擺明車馬」學Sammi，走儍大姐路線，片酬卻比Sammi低，故指千嬅有搶飯碗之嫌。
早前更有傳Sammi表示不會與曾和千嬅合作過的男演員合作，對此，Sammi日前接受專訪時，首次開腔否認傳聞，並大讚千嬅說：「你都話係傳言啦，我冇興趣為呢種嘢解釋，有人鍾意信就信囉，我又唔會痛嘅。最緊要係藝人同藝人之間明白諒解，我同楊千嬅冇因為呢啲傳聞而有誤會，之前見到面都有打招呼。」
問Sammi對千嬅有何感覺？她說：「我覺得佢好開朗，係個勤力同外向嘅人，我都覺得有時佢嘅神態同某啲角度都同我幾似㗎。」
Sammi表示她不介意新人以翻版Sammi來作宣傳，當提到與她極相似的新人趙頌茹（阿Yu）時，她更興奮地說：「嘩！佢真係好似㗎，我都覺得幾可亂真，有時睇報紙見到佢啲相，重以為係自己影呀。有個人同你咁似樣，感覺好得意，佢講嘢神態同我好似，又一樣唔鍾意笑，coolcool哋咁。佢啲歌我就未有印象，我聽人講其實佢真人冇咁似，係影相真係好似囉。」
Sammi外表予人硬朗感覺，常有傳言指她為人難相處，所以為她取花名。談到自我個性，Sammi表示其實她是外剛內柔的女人，她說：「朋友話我裏面係豆腐花，我覺得好啱。每個人性格都有兩面，再堅強嘅人都有軟弱嘅時候，再軟弱嘅人亦有強嘅地方。我自問唔夠圓滑，都唔怪得外界對我有誤解，真真假假是是非非，喺娛樂圈又何必太認真。」
Sammi續說：「人哋改我花名，我都唔嬲，唔開心嘅我唔會太上心，多個花名又唔會死，唔通要我淚眼矇矇對住觀眾咩？咁我過唔到自己。總之我自問係個好人，工作上遇到挫折，我只可以對自己講：『算啦。』」
採訪：蔡如玉 攝影：CheungManWah（JoinArt）
化妝：Zing 髮型