李國寶慣咗口沒遮攔，有時要佩服佢夠膽識，例如一再出聲叫政府出白紙草案。不過有時佢又會好似個大唔透嘅老頑童咁信口開河，噚日李華明就中招。
話說噚日李國寶喺立法會辯論緊二十三條之際，走去同肥仔明講，東亞會借錢畀議員參選，𠱁到肥仔明鬼咁開心，問佢息口P-2.5%得唔得？寶Baby好認真咁話咁低梗唔得。記者稍後捉住寶Baby追問，點知寶Baby一臉無辜咁話，冇諗過做議員借貸生意，只係同李華明講吓笑。
寶Baby呢頭講完笑，嗰頭就早走，同太太有影皆雙出席港大榮譽院士頒獎禮，連立法會二十三條辯論動議投票都缺席，睇嚟佢俾記者影到同廖小姐對飲馬天尼後，已經修心養性，日日返屋企湊孫慰妻。
（圖）嘉華主席呂志和（右）冧莊，繼上星期攞完中大嘅榮譽博士，噚日又喺李國寶手中領取港大嘅榮譽院士銜。 韋志滿攝
傳真︰2623-9278
電郵︰