要躋身一級方程式車手之列，必須過五關斬六將，經過層層等級嘅賽事磨練，才可取得機會；而寶馬車廠為鼓勵及發掘更多年輕車手，喺本年率先於德國舉行咗一個名為寶馬方程式（FormulaBMW）級別嘅賽事，令到喺小型賽車成長嘅年輕車手，有一個更有效嘅踏板，為進軍三級方程式賽車鋪路。此項賽事將於明年響亞洲區展開，從而提供更多機會給有潛質嘅亞洲年輕車手。
最新嘅寶馬方程式戰車──FB2，佢使用咗大量一級及三級方程式戰車嘅設計意念，全車只重455kg，並配備一台馬力達140匹嘅四汽缸引擎；呢台引擎係源自寶馬K系電單車嘅橫卧並列四汽缸16氣閥引擎，容積為1171cc，取其體積細小輕盈；配合全新設計並屬三級方程式戰車級別嘅HewlandFTR200六前一後波箱，FB2嘅極速可達230km/h。懸掛採用咗前後雙搖臂，前懸掛採用單筒式避震，而後懸掛則採用雙筒式避震，而且重係Sachs嘅可調校回彈及吸震嘅產品。前後制動系統都採用相同嘅雙活塞卡鉗，配254mm浮動煞車碟。
FB2經已通過咗FIA本年度三級方程式戰車嘅撞擊測試，能為車手提供最大保護。以2002年賽季為例，共有28位車手參加賽事，但沒有人喺意外中受傷。
喺眾多保護設備中，最特別係一張新設計嘅FORS（FormulaRescueSeat）賽車椅，呢張由慕尼黑寶馬賽車部門發展嘅碳纖維賽車椅，直接連結於車身上，特製嘅安全帶可以將車手牢牢地固定喺座椅上。而響意外發生時，救援人員可將車手連同座椅一起救出車外，甚至直接送入醫院內嘅X光機都無問題。此舉能減低扶離座椅，以及移動受傷車手時所產生嘅傷害。
記者會同場展出咗寶馬嘅一級方程式戰車，與FB2相比可謂有大巫見小巫之感。
寶馬喺70年代，經已開始發掘年輕車手，過去12年亦提供咗BMWADAC獎學金，畀有潛質車手進軍三級方程式車手之列；而今次介紹嘅寶馬方程式，則於2002年喺德國展開首季賽事，賽例為OneMakeRace，即只可使用單一款式嘅賽車，不可為戰車作出改裝，只可盡力調校，真正要鬥嘅就係車手嘅駕駛技術。
為支持有潛質嘅車手參與賽事，寶馬會於2003年賽季中挑選五位年輕車手，提供高達35,000美金（約港幣28萬元）嘅贊助；呢啲車手將由寶馬舉辦嘅車手訓練營內挑選出來，而年齡則會喺介乎15至20歲，從未有賽車經驗嘅年輕人。喺呢個訓練營內，除會教授賽車技術外，亦會着重科技、體能、語言等等與賽車活動有關嘅訓練。呢個訓練活動源自1991年，並已有超過40名畢業車手，成功晉身成為三級方程式車手行列。
雖然贊助費不足以支持整個賽季嘅賽事，但據寶馬嘅計劃經理MichaelMuehlberger表示，不完全嘅贊助能令車手要學習更多技巧，包括自行尋找其他贊助商，咁樣對佢哋日後嘅賽車生涯會有所幫助。
至於亞洲區嘅寶馬方程式賽事，將於2003年3月開鑼，由首站馬來西亞開始，至10月終點站中國北京為止，總共會有七站賽事，其中三站將於馬來西亞舉行，餘下則由中國、日本、韓國及泰國各自舉行一站，每站將會有兩場賽事。
如果車手希望參加贊助選拔，必須參加為期四日嘅車手訓練營，學費為3,200美元（約港幣2萬5千元）；有興趣可Click入