外國記者會（FCC）每兩個月出版一本雜誌寄畀會員睇，叫做TheCorrespondent，如果唔係記者或者外國報刊駐港特派員，對呢本雜誌肯定冇興趣；今期十月?十一月號有兩篇好文章，一篇係毛孟靜老公PhilipBowring懷念《遠東經濟評論》前總編輯戴維斯（DerekDavies,1931-2002），另一篇就係前彭定康、陳方安生、曾蔭權嘅英文文膽麥奇連（KerryMcGlynn）講「政府公關」。
麥奇連話政府公關嘅重點就係「正確政策，正確決定」，兩者皆正，公關戰爭已經贏咗一半，好容易打。換言之，政策不對頭，決策錯誤嘅話，公關戰就辛苦到極；麥奇連眼中嘅香港人非常機靈，一眼就睇得出草皮係天然嘅還是人造嘅，如果佢哋相信政府有誠意，政府就好易辦。
麥奇連舉基本法第二十三條為例。佢讀到嘅澳洲報紙報道，取向好平衡，冇刻意鬧香港政府，如果政府肯出「白紙草案」，等香港人、律師、傳媒睇清楚啲條文，公關就容易得多咯。香港要成為一個國際城市，受人重視，就必須資訊公開，能掌握世界及地區大勢，否則只算係中國一個城市。
睇完麥奇連篇文，我哋就知道點解特區政府啲公共形象咁曳，皆因麥奇連話「冇嘢可以代替良好政策，而呢啲政策須以老實態度向公眾解釋，等公眾深入辯論，並且得到傳媒參與。」特區政府啲財政政策、二十三條、居留權等等，你話是否合乎麥奇連嘅PR準則呢？