特首北上，又帶來中央支持特區的訊息，今次係「九招」之後另一劑「挺港」嘅藥方。
回歸前，香港乃天之驕子，勢估唔到一沉不振，要靠祖國打救。今次達成的3項「突破」，包括更緊密經貿關係在明年6月底前落實、皇崗客運春節開始24小時通關，以及再放寬內地旅客來港的配額，目的都係要加強珠三角的人流和物流。中國入世後，香港作為踏腳石地位的重要性已大幅下滑，今後亦只有借助珠三角的經貿發展優勢，進行經濟轉型，期望能重新建立對外的吸引力。
經濟轉型需要時間，立竿見影者，係24小時通關和放寬香港遊配額，後者對港經濟影響有利，毋庸置疑，前者則有爭議。
24小時通關會否令更多港人北上深圳置業呢？不少人都有這個憂慮，而股市反應亦顯示深圳地產公司會受惠，深圳地產股股價即時有反應。百仕達（1168）高收0.58元，升4仙，升幅7.4%；深圳控股（604）最高1.12元，收1.08元，亦升4仙。
雖然港人北上消費已成為趨勢，貪其價廉（此點冇人反對）、物美（此則見仁見智），唔少人亦已在內地置業，作度假屋用途。由於中國開放已有一段長時間，港人北上的習慣，亦已穩定下來，加上樓價此升彼落，深圳與香港間的差距已逐漸拉近，不會再成為北上置業重大的「誘因」，再考慮到交通費和社會設施問題，住在深圳的「着數」唔會太多，不應對香港樓市構成太大的負面影響。
話係咁講，新界北區嘅樓價，點都會有壓力。有人反而認為，24小時通關會吸引深圳人來港置業，為新界北區的樓市帶來支持，不過，筆者對此不會寄太大期望，畢竟內地人唔係咁易經常出入港境，而有此條件者亦不一定要置業。當然，個別情況或有之，但只會係極少數。
近期一手樓市銷情轉暢，分析家預計明年樓價會有8%至40%的升幅，筆者對樓價止跌回升亦有信心。中國要救香港樓市（即係救經濟），只要放寬投資（置業）移民便可以，此招肯定收效。
郭兆誠