工聯會嘅梁富華周三喺立法會向反對二十三條立法嘅人士同團體開火斷症，話民主派同大律師公會主席梁家傑係憂慮症嘅長期病患者、親台團體就患上驚恐症、記協同一啲傳媒患咗妄想症、佢重連主教陳日君都鬧，話佢患上老人癡呆症，診斷佢會有可能成為「病態聖徒」。
嘩！咁講都得？梁富華一向低調，雖然立會議員喺議事堂講嘢受到保護，但係都唔使去得咁盡，八方喺立法會遇到譚耀宗問佢點解，佢話，估梁富華滿肚怨屈氣，不吐不快，或者佢想學人做醫生，幫人睇病。
原來呢次辯論咁重火藥味，飛天豬朱幼麟係幕後黑手，佢叫曾鈺成用足火力掃低啲民主派，咁咪即係「精人出口，笨人出手」？八方以為以曾主席咁聰明唔會咁笨，點知聽完陳鑑林佢哋講嘢，先知飛天豬煽動成功。
傳真︰2623-9278
電郵︰